Nahikari Otermin: "Pasaiak aldaketa behar du, behin betiko bultzada emango dion gobernu talde, alderdi eta alkate euskalduna"
EAJk alkategaia aurkeztu du gaur Pasaian; Joseba Egibar eta Eider Mendoza izan dira Oterminen hautagaitza babesten.
Joseba Egibar, Nahikari Otermin eta Eider Mendoza, alkategaiaren aurkezpenean. Trintxerperako igarobide berrian aurkeztu du EAJk Nahikari Oterminen hautagaitza, eta ez ausaz, Oterminek berak adierazi duenez, EAJren aburuz, “biziberritzearen abiapuntua” izan delako Herrera eta Trintxerpe arteko pasarela. Aurreko agintaldian aurrera urratsak egin direla esan du, baina “Pasaiak benetako bultzada” behar duela gaineratu, “behin betiko bultzada emango dion gobernu talde, alderdi eta alkate euskalduna”. Otermin erronkari heltzeko prest agertu da, “gogotsu eta duela lau urte baino esperientzia gehiagorekin, baina lehen eguneko ilusio eta lanerako gogo berdinekin”.
Alkatetza eskuratuz gero EAJren lan lerroak zeintzuk izango diren ere aurreratu du: “tokiko ekonomia, pasaitarrek herrian bertan lan egiteko aukera izan dezaten; herritarren ongizatea, behar gehien dutenei erantzuteko eta biziberritzea sustatzen jarraitzea, Gipuzkoako ia eremurik degradatuena izatetik harro sentitzeko Pasaia izatera pasa dadin”.
Jeltzaleen lanaren zehar lerroak ere zehaztu ditu Oteminek: “Kultura, euskara eta berdintasuna”.
Nahikari Oterminen hautagaitza babesten, Gipuzkoako Buru Batzarreko presidente Joseba Egibar eta Gipuzkoako Batzar Nagusietako buru Eider Mendoza izan dira. Biei eskertu die babesa Oterminek, baita bere hautagaitza babestu duten alderdikideei ere.
