Tasak izoztuta eta hobari gehiago Errenteria Musikalen
Oro har, tasak izoztuta heldu da Errenteria Musikalen ikasturte berria, eta gainera, ikasleentzat onura gehiago izango direla azaldu dute arduradunek.
Errenteria Musikaleko orkestra, aurtengo ekainean. Datorren ikasturterako ordenantza fiskalak onartu ditu Errenteria Musikal Udal Musika eta Dantza Patronatuak. Oro har, tasak izoztuta heldu da eta gainera, ikasleentzat onura gehiago izango direla azaldu dute arduradunek. Hala tasak izozteaz gain, musikan ikasgai bat baino gehiago aukeratzen duten ikasleek deskontuak izango dituzte, “orokorrean %20aren bueltan ibiliko badira ere, zenbaitetan %45era ere iritsiko dira, esaterako, musikan gain dantzan ere matrikulatzen diren ikasleentzako”.
Hobarien eskaintza zabaldu du bestalde, eskolak. Instrumentuen zerrendan aukera gehiago izango da, eta matrikula doan izango dute kontrabaxua, tuba, tronpa, tronboia, eskusoinua, klarinetea, bonbardinoa, biola eta oboea aukeratzen duten adin txikiko ikasleek. Horrez gain, bizikidetza-unitatearen urteko sarrera gordinak aztertu eta matrikulan %65 eta %15eko deskontuak egiteko eskubidea eskainiko da aurten ere, baina berrikuntza batekin, datorren ikasturtean erabiliko diren tramuak nabarmen igo dira, “musika eta dantza zaletasuna duten familiek eragozpenik ekonomikorik ez izateko”. Horrekin guztiarekin, datorren ikasturteari begira matrikulazioa ugaritzea espero du patronatuak datorren ikasturtean, “herritar gehiagiorengana iritsiz. eta Errenterian musika eta dantza zabaltzeko xedeari eutsiz”.
