Udalak inauterietan koloretsu nahi du herria
Gaur aurkeztu dute egitaraua eta banderolak banatuko dituztela iragarri dute.
Trapujale, Gurutze Santuaren plazara sartzeko unean. Egun gutxi falta dira Trapujale Jaizkibel atzean utzi eta Lezorantz jaisteko eta lezoarrak buru-belarri dabiltza inauterien prestaketan.
Udalak gaur aurkeztu du aurtengo egitaraua, eta deialdi berezi bat zabaldu du, herritarrei inauterietako koloreekin leihoak eta balkoiak apaintzeko eskatuz. Lana erratzeko, banderolak banatuko ditu udalak kultura aretoan ostegun eta ostiralean, 17:00etatik 19:00etara. Zehaztu dutenez, sei banderola banatuko dizkiete eskatzaileei, inauterietako egun bakoitzak duen koloreen araberako bana. Horrela inauterietako egunaren arabera, dagokion koloreko banderola jarri beharko dute herritarrek etxeko leihoan.
Hilaren 28an hasiko dira Lezoko Inauteriak, Ostegunzuriz, eta Asteartebeltzean bukatuko dira, ohi bezala, Trapujaleren epaiketa eta herio bidaiarekin. Tartean hamaika ekitaldi izango dira.
Trapujale oroigarri bereziaren banaketa, aurten, Hezikuntza eta Pasaia-Lezo Lizeoa ikastetxeetako guraso elkarteei emango diete, Ostegunzurian, 20:00etan, Gurutze Santuaren plazan.
Egitaraua, etxez etxe, ostiralean hasiko dira banatzen.
