Ion Carballok ur lasaietako Gipuzkoako Txapelketa irabazi du
Indarberrituta ekin dio Pasaia Kayak taldeak denboraldiari; Donostia Kayak eta Pasaia Kayak behin betiko bereizi dira eta kirolari gehienak talde pasaitarrean lehiatuko dira aurrerantzean.
Seniorren podiuma Zumaian Aro berri bati ekin dio Pasaia Kayak piraguismo taldeak. Donostia Kayak eta Pasaia Kayak formalki erabat bereizi dira, eta palista gehien-gehienak Pasaia Kayaken koloreekin lehiatuko dira aurrerantzean, talde lehiakorragoa osatuz.
Zumaian ekin dio denboraldiri Pasaia Kayak-ek, eta ezin hobeto hasi. Ion Carballok irabazi zuen proba, estropadaren hasieratik buruan jarri eta 23 urtez azpiko Santiagotarrak taldeko Jon Moreno aurkari gogorra gaindituz, 20:29:92ko markarekin.
Iñigo Loisek biribildu zuen jarduna, 3. postua lortuta, Oier Aizpurua zumaiarrekin borroka bizian aritu eta gero brontzezko domina irabazita.
Emakumetan nabarmentzeko Amaia Benavente errenteriarrak lortutako bigarren postua, Irati Osaren atzetik.
Gazteak lehiakor
Pasaia Kayak taldeko gazteenak ere lehiakor aritu ziren Zumaian. Aiora Irazu oiartzuarrak brontzezko domina irabazi zuen, bere aurretik helmugaratu ziren Santiagotarrak taldeko bi palistekin podiuma osatuz.
Aipatzekoa baita ere Laura Zunzunegiren lana, Kadeteen Mailan, laugarren postuan helmugaratuta.
Taldekako sailkapenean hirugarren postua lortu zuen Pasaia Kaya-ek, garaipen historikoa taldearentzat, ur lasaietako probetan halakorik lortzen duen lehen aldia delako. Aurretik, Santiagotarrak eta Zumaiako Urola P.K sailkatu ziren, hurrenez hurren.
