[Emaitzekin] Munttarpek eskuan du ia-ia liga
Munttarpek bigarren zen Haritza Eibarren etxean irabazi ondoren, ia-ia eskura du mailaz igotzeko fasean jokatzeko txartela, eta liga.
Kurkubik etxean irabazi zuen ostiralean. Haritza Eibarrek 26, Munttarpek 31. Emaitza nabarmena. Ostiralean Munttarpek Eibarren jokatu zuen partida ez zen beste bat. Bigarrenaren kontra, haren kantxan, irabazi zuen. Horrenbestez, ondorioz batzuk: Gipuzkoako Lehen Mailako lider garbi da Munttarpe 26 punturekin, orain bigarren diren Eibarko taldeari eta Urnietari 5 puntuko aldea ateraz; Liga irabazteko faborito nagusi eta bakarra dira lezoarrak, hori bukatzeko sei partida falta direnean, ia-ia eskuan dute; igoera faserako txartela eskuan dutela esan daiteke, kataklismo aldrebesik ezean. Ondo, Munttarpe. Lehen urtea dute mailan, eta igoeraren alde borrokatuko dute. Datu nahikoa esanguratsua hori. Gainera, HITZAren pronostikoa betez, hirugarren eta laugarren postuan zeuden bi taldeen arteko partidan berdinketa izan zen. Jardunaldi biribila.
Munttarpeko emakumeek, berriz, garaipen errazarekin hasi dute Gipuzkoako Emakumeen Ligako 1-4 postuen fasea, Leizaran taldea goletan ia bikoiztuz, 14-27.
Bestalde, futbolean, Allerruren berdinketa ona Mondragonen kontra, larunbatean, Plazetan. Kanpokoak aurretik jarri ziren, etxekoek markagailua irauli egin zuten, eta Mondrak berdinketa lortu. Baita partidaren azken zatian aski asko estutu ere. Ontzat eman daiteke puntua. Eta hilabetea: otsailean ez du partidarik galdu gizonen Allerruren talde nagusiak, Ohorezko Preferente mailakoak: hiru partida irabazi ditu, eta bat berdindu, larunbatekoa. Nahiko lukete, bai, lezoarrek, liga bukatu arteko hilabete guztiak otsaila izatea.
Beste emaitza on bat, areto futbolean. Jaixki AFTk 4-7 irabazi zion Herrikide taldeari haren kantxan. Jakinda lezoarrak hirugarren daudela, eta tolosarrak laugarren, ospatzeko moduko garaipena kontrario zuzen baten aurrean. Lider dira Gizonen Gipuzkoako Lehen Mailan Euskalduna eta Orixe Tolosaldea, 41na punturekin; Jaixkik 40 ditu. Haien zelatan daude lezoarrak, lidergoari noiz kosk egin zain. Gaintxu AFTk, berriz, etxean sailkapenean atzetik duen Clinica Dental Aldaz taldearen kontra galdu egin zuen, 3-5. Sasoia luzeegi ez egiteko, hurrengo partida irabaztea komeniko litzaieke.
Jarraian, Lezoko talde nagusi guztien asteburuko emaitzak.
FUTBOLA
Gizonen Erregional Ohorezko Maila
- Allerru-Mondragon 2-2
Emakumeen Gorengo Maila, Kopa
- Allerru-Euskalduna 2-3
Gizonen Gazteen Ohorezko Maila
- Touring-Allerru 6-0
Gizonen Gazteen Lehen Maila, Kopa
- Beti Ona B-Allerru 0-1
ESKUBALOIA
Gizonen Gipuzkoako Lehen Maila
- Haritza Eibar-Munttarpe 26-31
Emakumeen Gipuzkoako Liga, 1-4 postuetarako fasea
- Leizaran-Munttarpe 14-27
ARETO FUTBOLA
Gizonen Gipuzkoako Lehen Maila
- Gaintxu AFT-Clinica Dental Aldaz 3-5
- Herrikide-Jaixki AFT 4-7
SASKIBALOIA
Gizonen Gipuzkoako Hirugarren Maila
- Kurkubi SBK-Ostadar 62-45
