- Hilak 25-Martxoak 9: Errenteriako Emakumeen Aztarnak: Erakusketa Idoia Beratarbideren ilustrazioak Xenpelar Etxean Antolatzailea: Berdintasunerako Kontseilua
- Martxoak 2: IX. Mariasun Landa Sarien banaketa 12:00etan Emakumeen Etxean Antolatzailea: Berdintasunerako Kontseilua
- Martxoak 7 : Jaialdia Egin dezagun aurrera, badugu zer lortu leloarekin 17:30 Galtzarabordako kiroldegian Antolatzaileak: Auzoetako emakume elkarteak
- Martxoak 8: Heteropatriarkatu kapitalistari planto! Grba feminista. 09:30ean, auto karabana Pontikako aparkalekutik abiatuta; 10:00etan, karpa feministaren irekiera Zumardian; 12:00 Manifestazioa Herriko Plazatik abiatuta; 14:00etan bazkari autogestionatua karpa feministan; 15:30ean Tribial Feminista karpa feministan; 17:00etan informazio banaketa erdialdeko kaleetan; arratsaldeanz ehar kartel eta pankarta tailerra manifestazioan erabiltzeko; 19:00etan manifestazioa Herriko plazatik abiatuta. Antolatzailea: Oreretako Mugimendu Feminista.
- Martxoak 9: Kontzertua Aretha Franklin berdintasunaren aldeko borroka 12:30 Niessen Kulturgunean Antolatzailea: Errenteriako Musika Kultur Elkartea – EMKE
- Martxoak 10: Emakume Master Cup: Emakumeen Binakako Esku Pilota txapelketaren finalerdiak (ETB zuzenean) 12:00-14:00 Agustina Otaola Raketista Profesionala Frontoian Antolatzailea: Errenteriako Udala.
- Martxoak 12: Gure gorputza, gure erlazioak: 50 urte ondoren bizi-bizi hitzaldia 18:00 Emakumeen Etxean. Antolatzailea: Errenteriako Udala.
- Martxoak 23: Emakumeen Etxearen festa. Antolatzailea: Emakumeen Etxearen Batzarra.
- Martxoak 30: Etxeko Langileen II Festa. 16:00- 20:00 Emakumeen Etxean. Antolatzailea: Sos Arrazakeria
- Martxoak 7, 14, 21, 28: Emakumeen XV. Zine Emanaldia Amalatz Talde Feministak antolatuta. Verano; La Calle de las tentaciones; Fabricando mujeres; eta Una mujer fantastica filmak. 18:00 Niessen Kulturgunean, doan.
Kaleak hartuta, herria gelditzera doaz
Emakumeen Nazioarteko Egunaren harira Errenteria-Oreretako auzoetako emakume taldeek, Berdintasunerako Kontseiluak, Oreretako Mugimendu Feministak, Amalatz Talde Feministak, SOS Arrazakeriak eta EMKE Errenteriako Musika Kultur Elkartearen bandak antolatutako egitarau zabal eta askotarikoa aurkeztu dute gaur.
Martxoaren 8ko egitaraua aurkeztu dute. Greba feministak markatuko du Martxoaren 8a, eta iazkoa handia izan bazen, aurten are eta jarraipen handiagoa izango duela aurreikusi daiteke. Greba egiteko arrazoiak bere horretan mantentzen dira. Indarkeriari, parekidetasun ezari, prekarietateari, sexualitate eredu hegemonikoei, lanen sexuaren araberako banaketari, kontsumo ereduari, familia patriarkalari, jakintzen hierarkizazioari, arrazakeriari, edertasun kanonari eta finean, zapalkuntza guztiei aurre egingo die Martxoaren 8ko greba feministak.
Emakumeen Nazioarteko Egunaren harira Errenteria-Oreretako auzoetako emakume taldeek, Berdintasunerako Kontseiluak, Oreretako Mugimendu Feministak, Amalatz Talde Feministak, SOS Arrazakeriak eta EMKE Errenteriako Musika Kultur Elkartearen bandak antolatutako egitarau zabal eta askotarikoaren berri eman dute gaur eguerdian egindako agerraldian. Garazi Lopez de Etxezarreta Berdintasun zinegotziarekin batera aurretik aipatutako taldeetako ordezkariek hartu dute parte agerraldi horretan.
Martxoaren 8ko greba feministari babesa azalduko diola gaur arratsaldean Errenteriako Udalak esanda ekin dio agerraldiari Lopez de Etxezarretak, “espero dut aho batez onartuko dugula adierazpen instituzionala, eta konpromisoa hartuko dugula Errenteriako Udalean lan egiten duten emakumeek greba eskubidea gauzatu ahal izateko behar diren erraztasun guztiak emanez”. Aurtengo Martxoaren 8a oso berezia izango den zalantzarik ez du, gainera, “iazkoaren ondotik oraindik indar handiagoko greba baten proposamenarekin datorrelako. Gure herrira etorrita gainera, data horrek bat egingo du Emakumeen Etxearen irekierarekin. Bi elementu horiek dira udal gisa garrantzitsuenak, babes osoa eta bultzada greba feministari, eta bestetik Emakumeen Etxea zabalduko dugula larunbatean”. Ateak zabaltzeko ekitaldi berezia hartuko du gainera Emakumeen Etxeak, Mariasun Landa Lehiaketaren sari banaketa ekitaldia, hain zuzen ere. 12:00etan izango da hori. Aurretik, baina, 11:00etan bisita izango dute zinegotzi guztiek Emakumeen Etxearen Asanbladak gidatuta etxea ezagutzeko.
Berdintasunerako kontseiluak antolatutako egitarauaren barruan Emakumeen Binakako Esku Pilota txapelketaren finalerdiak jokatuko dira Agustina Otaola Raketista Profesionala Frontoian martxoaren 10ean, 12:00etan hasita. ETBk zuzenean emango du partida hori. Saiakera berezia egin dutela partida hori Errenteriara ekartzeko esan du Berdintasun zinegotziak. Horrekin batera atzo zabaldu zen Errenteriako Emakumeen Aztarnak erakusketa nabarmendu du. Idoia Beratarbide artista eta ilustratzaile oiartzuarrak Errenteriako emakumeen aztarnak libururako sortu dituen ilustrazioekin atondu du erakusketa hori Xenpelar Etxean eta martxoaren 10era bitartean izango da zabalik.
Etxeko langile eta migratzaile
SOS Arrazakeriak bat egin du Martxoaren 8ko egitarauarekin. Zehazki, etxeko langile migratzaileek, eta beraiek azaldu dute zergatik gaurko agerraldian. Sandra Gonzalez Vasquez, Wendy Rodriguez, eta Tatiana Bellorin migratzaileak dira, eta etxeko langileak. Hilaren 30ean etxeko langileen bigarren festa egingo dute Emakumeen Etxean, baina hori aurkeztearekin batera, aldarrikapenerako eta elkartasunerako baliatu dute gaurko agerraldia. Etxeko langile eta migratzaileen lana agerian jartzeko beharra nabarmendu du Gonzalezek, “Gipuzkoan 10.000 etxeko langile gara gizarte segurantzan afiliatuta, eta horiei laneko kontraturik ez dutenak gehitu behar zaizkio. Gure eskubideak errespeta daitezen eskatu nahi dugu. Hemen zaudeten gainontzeko emakumeen adibidea garrantzitsua da guretzat, antolatu eta gure eskaerekin borrokan jarraitzeko”. Migratzaile eta etxeko langile diren neurrian, bat egin dute gainera, Martxoak 8ko greba feministarekin, “gure aldarrikapenekin izango gara kalean, eta dei egin nahi diegu etxeko langile guztiei grebarekin bat egitera modu batera edo bestera”.
Emakumeen arteko babesa ezinbestekotzat jo du Rodriguezek, bestalde, “elkarrekin garaiezinak izango garelako”.
Auzoetako emakumeek era hartu dute hitza gaurko agerraldian. Ezaguna da dagoneko urtero Martxoaren 8aren harira antolatzen duten jaialdia. Galtzarabordako kiroldegian izango da martxoaren 7an Egin dezagun aurrera, badugu zer lortu lelopean 17:30ean hasita. Dantza, antzerkia, esketxak… guztira 11 emanaldi egingo dituzte jaialdiaren barruan eta herritar guztiak deitu dituzte bertaratzera. Martxoaren 7an egingo dute emanaldia, beraiek ere bat egin dutelako Martxoaren 8ko greba feministarekin.
Eli Etxabegurenek hartu du hitza mugimendu feministaren izenean eta aurten jauzia egingo dutela esan du greba orokor feministarekin. Hilabeteak daramate greba prestatzeko batzar irekiak egiten, eta horietan 40 emakumetik gora ari dira parte hartzen. Martxoaren 8ko greba feministaren helburua mundua gelditzea dela esan du Etxabegurenek, “kasu honetan Orereta gelditzea. Helburua da erakustea emakumeak gabe ez duela sistemak funtzionatzen eta hori ikustaraztera goaz”. Greba kalean ikustaraztea beharrezkoa ikusi duela mugimendu feministak gaineratu du Etxabegurenek, “gure helburua da emakume guztiak Martxoaren 8an goizetik gauera arte kalean izatea eta horri lotuta atondu dugu egitarau bateratua batzarrean”. Emakume guztiak deitu ditu mugimendu feministaren izenean greba egitera, “bakoitza bere errealitatetik. badakigu kasu askotan zaila izango dela greba egitea, baina hamaika modu daude bat egiteko: amantalak balkoian jartzea da bat, manifestazioan parte hartzea bestea, egun guztia kalean ematea, lanera ez joatea, etxeko zaintza lanak gizonek egin ditzaten bultzatzea… Bakoitzak bere errealitatetik bere plantoa egitea nahi dugu”
Martxoaren 8rako egitarau zabala antolatu du mugimendu feministak: Auto karabana, karpa feminista, manifestazioak 12:00etan eta 19:00etan, azken hori Oarsoaldekoa izango da, bazkari autogestionatua, tribial feminista, informazio banaketa, kartel eta pankarta tailerra, afari autogestionatua eta sorpresak.
EMKEk ere bat egin du
EMKEren Musika Bandak ere bat egin du Martxoaren 8ko egitarauarekin. Alain Aierdi zuzendaria izan da agerraldian, eta beren ekarpenaren berri eman du. Zehazki, kontzertua antolatu dute martxoaren 9an Niessen kulturgunean 12:30ean. Doakoa izango da baina gonbidapenak jaso behar dira aurretik Niessen Kulturguneko leihatilan. Aretha Franklinek berdintasunaren alde egindako borrokagatik hautatu dute emanaldi horri amaiera emateko, baina zuzendaria ere egun horretan emakumea izango da, Hondarribiko Musika Bandaren zuzendaria den Alazne Alberdi. Elisa di Pietro abeslaria ere arituko da musika bandarekin batera. Franklinekin emakumeen iragana erakutsi nahi duela bandak esan du Aierdik, Alberdi eta Di Pietrorekin, berriz oraina. Etorkizuna ere irudikatuko dute ordea, emanaldi horretan hiru ikasleren parte hartzearekin: Ane Aristizabal, Ane Espina eta Natalia Llamazaresekin.
Martxoaren 8ko klasikoa den Amalatzen zine emanaldiak ere hutsik ez du egingo. lau emanaldi antolatu dituzte guztira, Niessen Kulturgunean izango dira emanaldi guztiak 18:00etan hasita.
Egitaraua
