[Galeria eta bideoa] Harro iritsi da Lezora Trapujale
Trapujale Martizkone baserritik Lezoko kaskora jaitsi da inauterietan gozatzera. Herriak harrera berao egin dio. Harro dago Trapujale.
Trapujale, gaur, harro udaletxean. Martizkone baserria utzi, eta Lezon da jada Trapujale. Ez du hutsik egin aurten ere. Harro samar iritsi da herrira Ostegunzuriarekin; zain izan da urtebetez herriaren kaskoa zapaltzeko, eta harro sartu da Gurutze Santuaren plazara musika eskolako ikasleen musikarekin, eta Donostiako Alde Zaharreko joaldunekin. Harroegi aukeran.
Dena dela, plazan zirenek besoak zabalik jaso dute Trapujale. Bete egin da Gurutze Santuaren plaza. Inauteri gogoz daude lezoarrak, eta Martizkonen gaur arte egon dena ikusita, zoratu egin dira ia. Pozik. Eta oso pozik ere aurten omendu egin dituzten Hezikuntza Lezo Herri Eskolako gurasoen elkartea nahiz Pasaia-Lezo Lizeoko gurasoen elkartea. Lan handia egiten dute haiek ere euren ikastetxeetan eta herrian inauteri giroa bultzatzeko. Bejondeiela!
Trapujaleren dantza egin dute plazan lezoarrek. Hemen bideoa:
Gaurkoak eginda, jaia piztuta, bihar gehiago. Goizean ikastetxeek hartuko dute inauterien lekukoa. Arratsaldean, festa areagotu egingo da. Hemen Ostiraloriko egitaraua:
- 09:30. Lezo Herri Eskolako eta Lezo Institutuko ikasleen kalejira herritik.
- 10:30. Lezo Herriko Eskolako eta Lezo Institutuko ikasleen Sentimenduak ikuskizuna Bekoerrota kiroldegian.
- 11:00. Pasaia-Lezo Lizeoko ikasleen eskutik, Trapujale festa Gurutze Santuaren plazan. (eguraldi txarrarekin Karlos Saldisen egingo dute).
- 17:30. Murixka Dantza Taldearen lokaletik abiatuta, Sorgin Dantza eta Zirikuen kalejira.
- 19:30. Lorezainen konpartsaren saioa Gurutze Santuaren plazan.
- 20:00. Enkartelada.
- 21:30. Herri afaria Gezala pilotalekuan. Txartelak 13 euroan betiko tokietan salgai.
Horiek biharkoak. Gaurko argazkien galeria, hementxe:
