Lau ordu Jaizkibelgo sugarrak kontrolatzeko
Sutea itzaltzeko lanek behartuta Hondarribia eta Pasaia arteko errepidea itxi egin behar izan zuten.
Suhiltzaileek, basozainek eta Ertzaintzak parte hartu zuten itzaltze lanetan Iluntzeko 20:00etarako kontrolpean zuten atzo arratsaldean Jaizkibelen piztutako baso-sutea. 16:30ak inguruan piztu zen alarma, ke beltza inguruko hainbat herritatik ikusten zela. Gerora jakin denez, lau gune ezberdinetan piztu zen sua, eta haize aldaketak puntu horietako batean sugarrak asko zabaltzea eragin zuen, errepidearen itxiera behartzeraino. Hala ere, suhiltzaile eta basozainen elkarlan eraginkorrari esker lau orduko epean kontrolpean zegoen sutea. Oraindik ez dute ofizialki argitu sutea zerk eragin duen, baina nahita eragindakoa izan daitekeenaren susmoa zabaldu da.
Egun bereziki konplikatua izan zen atzokoa suhiltzaileentzat. Aralarren, 30 eta 40 hektarea artean erre ziren Zabalegi mendian. Eusko Jaurlaritzako Segurtasun Sailaren arabera, Amezketa aldetik sortu eta Bedaio arteko mugaraino zabaldu zen sutea.
Bizkaian pertsona bat zendu zen Derion nahigabean eragindako sutea itzali nahian, eta Nafarroan ere izan ziren atzo suteak, bereziki larria, Goizuetakoa. Bi helikoptero erabili behar izan zituzten, eta ur hegazkin bat ere eskatu zioten Espainiako Gobernuari, garrak itzaltzeko. Ehun hektareatik gora erre ziren atzo Goizuetan.
