Terrakotazko soldaduen erakusketa hartuko du Zirizak
Martxoaren 15ean zabalduko dute eta ekainaren16ra bitartean izango da Trintxerpen
Aldundian aurkeztu dute erakusketa Terrakotazko soldaduen erakusketa zabalduko dute Trintxerpeko Ziriza Etxean. Gaur aurkeztu dute, Gipuzkoako Foru Aldundian, kultura diputatu Denis Itxasok eta Pasaiako alkate Izaskun Gomezek, erakusketako komisarioaren laguntzaz. Iragarri dutenez, martxoaren 15ean inauguratuko dute eta ekainaren 16ra bitartean bisitatu ahalko da.
Pasaiara ekarri baino lehen, Terrakotazko armadari buruzko erakusketa ibiltari hau, Bartzelona, Madril, Sevilla, Vigo, Oviedo, Mallorka eta Torrelavegan ikusi ahal izan dute, eta gaurko aurkezpenean nabarmendu dutenez, egon den toki guztietan bisitari asko erakarri ditu. Izan ere, Txinako Xianeko terrakoten aztarnategia munduko zortzigarren gauza miragarritzat hartua da eta munduko aztarnategi bisitatuenetako bat da.
Erakusketa handia da, 165 piezaz osatuta, horietatik 80 berezko tamainakoak, eta tartean dira Qin Shi Huang-en mausoleoko aurkikuntzen 70 erreprodukzio eder. Gobernariak, ofizialak, gerlariak, zaldiak, armak, bitxiak, garaiko tresneria… denetarik ikusteko aukera izango da, eta horiez gain, hobi famatuen erreprodukzioak. Gaiaren gaineko film dokumental bat eta elementu interaktiboek osatzen dute erakusketa.
Aurkezpenean erakusketaren komisarioak goraipatu duenez, “familian bisitatzeko erakusketa aproposa” da, “denboran bidaia interesgarri eta erakargarria bat”.
Haur gune bat ere izango du Zirizako erakusketak, “haurrak arkeologoetara jolasteko lekua”.
Sarrerak, 9 euroan helduentzat eta 6 euroan 3 urtetik gorako haurrentzat, Interneten daude salgai. Familientzako pack bereziak ere aurreikusiak dituzte, eta sarrerarekin Albaola bisitatu ahal izateko deskontuak.
Izan ere, aurkezpenean Izaskun Gomezek nabarmendu duenez, erakusketa Pasaiara bisitariak erakartzeko eta Pasaia ezagutzera emateko baliatu nahi dute, biziberritzeari bultzada bat emateko hirigintzatik harago.
Ordutegia
- Astearte eta ostegunean: 16:00etatik 20:00etara.
- Ostiraletan eta jai bezperetan: 16:00etatik 21:00etara.
- Larunbatetan, igandetan eta jai egunetan: 11:00etatik 14:00etara eta 16:00etatik 21:0etara.
- Aste Santua eta Pazko Astea: 11:00etatik 14:00etara eta 16:00etatik 21:00etara.
