Trapezista, pailazo eta malabaristak dira andre eta jabe
Heldu dira inauteriak, Ereintza elkartearen eskutik Azeri Dantzak hasi du kolore eta mozorro festa eta aurretik haurren Azeri dantzak girotu du Herriko plaza.
Azeri Dantza 40. urtez dantzatu du Ereintzak. Hasi dira inauteriak. Zirku erraldoia da Errenteria-Orereta eta trapezista, pailazo eta malabaristak bihurtu dira andre eta jabe. Izan ere, beraiek hartuko dituzte kale, plaza eta bazter guztiak gaurtik datorren asteartera arte. Asteme, Katukok eta Oilarqueenek pregoia irakurrita hasi da festa, Ereintza Dantza taldearen Azeri Dantzarekin. Gaur ere, urtero legez zirikatu dituzte bazterrak eta kolorez bete. Lepo zen Herriko plaza haien emanaldiaren zain eta erruz txalotu dituzte dantzari abilak eta ez hain abilak bildutakoek. 40. urtez dantzatu dira, gaurkoarekin Ereintzakoak, inauteriari hasiera emateko.
Asteme, Katukok eta Oilarqueenek mezu garbia helarazi dute eta aho batez babestu Martxoaren 8ko greba feminista eta jaietan ere ez ezetz dela esan dute ozen.
Nagusien aurretik, haurren azeri dantza egin dute Herriko plazan bertan. Haiek ere zirikatzen trebeak direla erakutsi diete emanaldia ikustera bildutakoei.
Amulletaren Danborraren kofradiaren danborren burrunbak dardarka jarri ditu bazterrak, ondoren, Lagunak txarangak lagunduta.
Ikastetxeak izango dira bihar protagonista, beraiek hartuko dituzte kaleak zirku bihurtzeko. 11:30ean Koldo Mitxelena Herri ikastetxeko ikasleak irtengo dira ikastetxetik bertatik eta herrian barrena ibiliko dira. 14:30ean, berriz euskal inauteriarekin jantziko dute Beraun auzoa Bizarain Ikastolako ikasleek. Ordubete geroago, berriz, 15:30ean Orereta Ikastolako ikasleek hartuko dute kalea. Azken horiek ere euskal inauteria aukeratu dute.
Azeri Dantzaren irudiekin argazki galeria egingo du bihar HITZA-k.
