Gizon bat atxilotu dute hiru autotan lapurtu eta furgoneta batean kalteak eragitea egotzita
Hiru autotan lapurtu eta furgoneta batean kalteak eragitea leporatuta 20 urteko gizon bat atxilotu du Ertzaintzak gaur goizaldean. Gertakaria 04:30ean izan da.
Hiru autotan lapurtu eta furgoneta batean kalteak eragitea leporatuta 20 urteko gizon bat atxilotu du Ertzaintzak gaur goizaldean. Gertakaria 04:30ean izan da. Bizilagun batek Ertzaintzara deitu du gizon batek Martin Etxeberria kaleko auto batetik hainbat kutxa lapurtuta Juan Olazabal kalera abiatu dela esanez.
Berehala heldu dira ertzainak eta hainbat kutxa zeraman gazte bat topatu dute. Gaztea identifikatuta, autoa ikuskatzera hurbildu dira eta kristaletako bat apurtuta zuela eta barruan gazteak zeramatzan kutxen antzekoak zeudela ohartu dira. Gaztea miatuta, kristal zatiak atzeman dizkiote arropan, eta poltsiko batetik tenazak erori zaizkiola ohartu dira. Horrenbestez, atxilotu eta komisariara eraman dute lapurretaren ustezko egilea izatea leporatuta.
Atxilotutako gaztea beste bi autoren lapurretarekin ustez lotuta dagoela jakinarazi du segurtasun sailak, baita hirugarren batean eragindako kalteekin ere. Beste hiru ibilgailu horiek kale berean zeuden aparkatuta. Autoetako batean eskuko telefono bat lapurtu du, GPS dispositibo bat eta dirua, eta beste batean, berriz, hainbat erreminta, betiere segurtasun sailak emandako informazioaren arabera.
