EAJk herritarren ekarpenak jaso nahi ditu kanpainan zehar
Galdetegiak banatuko dituzte etxeetara eta herritarren erantzunak Batzokien kanpoaldean jarri dituzten postontzien bidez jaso.
Nahikari Otermin, EAJren alkategaia, Trintxerpeko Batzokiaren kanpoaldean, Serafin Esnaola plazan. “Herritarrekin batera” eraiki nahi du Pasaia Nahikari Oterminek, eta “haien iritzia kontuan hartuta Pasaiari behar duen behin betiko bultzada eman”. Hala eman du aditzera gaur goizean EAJren alkategai Nahikari Oterminek “programa osatzeko eta ekarpenak biltzeko martxan jarri duten kanpaina” aurkezteko Trintxerpeko Batzokian eman duen prentsaurrekoan.
Oterminek azaldu duenez, eskuorri bat banatuko dute datozen egunotan Pasaiako etxe guztietara, “kezka nagusiak zein diren eta hainbat gaien inguruan herritarrek zein iritzi duten ezagutzeko”. Eskuorri horiek, Antxoko, Donibaneko eta Trintxerpeko batzokien kanpoaldean jarri dituzten postontzietan utz daitezke hilaren 24a bitartean.
Horrez gain, posta elektronikoz, sare sozialen bidez (facebook: @pasaiako.eajpnv; Twitter:@eajpnvpasaia) edota whatsappez ere (688 804 573) jasoko dituzte herritarren kezka, proposamenak edota iradokizunak.
