Eraso matxista izan da Errenteria-Oreretan
Emakumea salaketa jartzera joan da, eta erasotzailea atxikita du Ertzaintzak erasoa gertatu den lekutik hurbil.
Ertzaintzak erasotzailea atxikita izan dute. Eraso matxista izan da Errenteria-Oreretako Etxeberrieta auzoan, 11:45 inguruan. Emakume bat atera da atari batetik ihesean, laguntza eske oihuka, eta haren atzetik gizon bat emakumea mehatxatzen. Errenteriako EAJk agerraldi egin behar zuen bertan, udal hauteskundetarako alkategaia eta zerrenda aurkezteko. Hura hasi aurretik izan da erasoa.
Eider Mendoza Batzar Nagusietako presidentea eta Maite Peña Gizarte Politiketako diputatua, agerraldia egin behar zuten gunera bidean zirela izan dira erasoaren lekuko. Peñak eta Mendozak babestu eta artatu dute emakumea, eta Mendoza Errenteriako Ertzain Etxera erasotako emakume laguntzera joan da polizia etxera. Erasotzailea, berriz, Ertzaintzak izan du atxikita, erasoa izan den gunetik hurbil. Bertan ziren ere EAJren agerraldia jasotzera joan diren hedabideetako kideak, HITZAko kazetaria horien artean.
Maite Peña eta Markel Olano.
Bertan behera utzi du EAJk agerraldia. Markel Olano ahaldun nagusiak gertaeraren gaineko adierazpenak egin ditu soilik. Errenteriako Udalerako taldea aurkezteko prestatzen ari zirela bete-betean bortizkeria matxistaren lekuko izan direla esan du Olanok: “Gertaera horren aurrean aurkezpena bertan behera uztea erabaki dugu, ez delako unea aurkezpen bat egiteko halako kasu bortitz bat gertatuta”. Olanok berak jakinarazi du emakumea salaketa egitera joan dela Ertzain Etxera.
Babes osoa erakutsi dio Olanok erasotako emakumeari, eta gogor gaitzetsi du erasoa, “gure helburu nagusia emakume hori babestea da, eta horregatik joan da Eider Mendoza berarekin komisariara, gertu-gertuan egotera”. Indarkeria matxistaren aurrean “zero tolerantzia” izatera deitu du Ahaldun Nagusiak, eta salaketan parte hartzeko prest azaldu da bertan diren EAJko gainontzeko kideekin batera, “lekuko izan garelako”. Ez pertsonala soilik, babes instituzional osoa ere adieraziko diotela esan du Olanok.
Oreretako Mugimendu Feministak jada deia egin du gaurko erasoa salatzeko. Asteazkenerako elkarretaratzea deitu du, 19:30ean, Gernika plazan.
