[Galeria] Memoriaren Basoa eraikitzen, lanean gogor
Lezoko Memoriaren Basoa eraikitzeko bidean, beste auzolan bat egin zuten Lezon larunbatean. Eremu berri bat berreskuratu dute, Sotxoko bidearen ondokoa.
Auzolanaren une bat. Larunbat goizean Lezoko Memoriaren Basoa eraikitzeko beste urrats bat egin zuten. Etxetxo Lezoko Memoria Historikoa taldearen, eta Lezoko Ekoloji Taldearen lanari esker, 1936ko Gerrak eta frankismoak utzitako arrastoa urteen zuloan gal ez dadin iniziatiba gorpuzteko auzolana egin zuten. 20tik gora izan ziren Jaizkibelek Lezo aldera ematen duen magalean lanean ibili zirenak.
Orotara, 75 bat zuhaitz landatu zituzten, bertakoak: haritzak, lizarrak eta gorostiak. Uste baino zailtasun handiagoz landu zuten lurra, heze-heze zegoelako. Sotxoko herri bidearen ondoko eremu batean jarri zituzten zuhaitzak, aurretik ahalegin handiz berreskuratutako eremu batean. Bi taldeen arteko elkarlana gozagarri eta eredugarri izan zen beste behin.
Etxetxok frankismoaren esklaboak Lezora ekarri zituzteneko 80. urteurreneko ekitaldiak egiten ari da aurten. Hala, ostegun honetan (hilaren 14an) La voz dormida filma emango dute Gezala Auditoriumean, 19:00etan hasita. Sartzea doan da. Etxetxok jakinarazi du, urteurren horren testuinguruan jarduera gehiago antolatzen ari dela urria bitartean. Horietako bat, gaiaren gaineko dokumentala.
Jarraian, larunbateko auzolanaren hainbat une.
