Politika turistikoak aztertuko ditu Pasaiako EH Bilduk
Pasaiako eredu turistikoa osatu aurretik, gertuko esperientziak ezagutu eta baliatu nahi ditu koalizio abertzaleak.
Kezka dago turismo ereduaren gainean, eta horretaz jakitun, Pasaiako EH Bilduk hitzaldi bat antolatu du Donibanen gaian sakondu asmoz. Helburua gertuko beste esperientziak ezagutu eta horietan sakontzea, gerora esperientzia horiek baliatzeko Pasaiako eredu turistikoa garatzeko orduan.
Hiru hizlari gonbidatu dituzte hitzaldira: Zumaiako zinegotzi Alex Oliden, Azpeitiko zinegotzi Josu Labaka eta Donostiako BizilagunEkin plataformako kide bat.
Hitzaldia, herritar orori irekia, asteazkenean (hilak 13) izango da, 19:00etan, Donibaneko kultur guneko komunikazio gelan.
