Udalak eta Alokabidek sinatutako hitzarmenarekin "pozik" azaldu da EAJ
Errenterian hutsik dauden etxebizitzak merkaturatzeko udal gobernuak hartutako neurriak, hala nola, Ondare Higiezinen Zergaren errekargua, ez dira eraginkorrak EAJren iritziz.
EAJko Garbiñe Oiarbide, Maite Peña eta Jose Manuel Franco. Pozik agertu da EAJ, Errenteriako Udalak Alokabiderekin etxebizitza hutsak merkaturatzeko hitzarmena sinatu duelako. “Ia lau urteko atzerapenarekin bada ere sinatu du udalak hitzarmena”. Errenterian hutsik dauden etxebizitzak merkaturatzeko udal gobernuak hartutako neurriak, hala nola, Ondare Higiezinen Zergaren errekargua, ez dira eraginkorrak EAJren iritziz eta horren harira 2015eko hauteskunde programarako etxebizitza hutsak merkaturatzeko proposamena landu zuela nabarmendu du: “Helburua gazteek etxebizitza eskuratzeko dituzten zailtasunei irtenbidea ematea eta zailtasun gehien dituzten kolektiboei etxebizitza eskuragarritasuna erraztea”.
Etxebizitzaren arazoak asko kezkatzen dituela esan du alderdi jeltzaleak, “hala adierazi dugu behin eta berriz agintaldi guztietan eta zentzu horretan, egin ditugu udal aurrekontuetan proposamenak. Aurtengo aurrekontuetan izan du, azkenik, baiezko erantzuna eta udal gobernuak gure eskaera aurrekontuetan txertatzea onartu zuen”.
