Itsasertzaren kontserbazioaren aldeko jarduerak Pasaiako liburutegietan
Eguzki talde ekologistarekin egindako elkarlanari esker, erakusketak, ipuin kontaketak, hitzaldia eta txangoa izango dira aukeran.
Grankanto eta San Juanarrira irteera antolatu dute Ingurumen hezkuntzari ekarpena egin asmoz, Pasaiako udal liburutegiek itsasertzaren zaintza sustatzea xede duten hainbat jarduera antolatu dituzte Eguzki talde ekologistarekin elkarlanean.
Martxoaren 25etik apirilaren 12ra bitartean, Trintxerpeko, San Pedroko eta Donibaneko liburutegietan, Oceanak eta EBEOk Jaizkibel mendia Natura 2000 sarean txerta dezaten eskatzeko landutako proposamena izango da ikusgai. Panel informatiboak eta argazkiez gain, ikus-entzunezkoak proiektatuko dituzte, guztiak itsasertzaren zaintza eta itsasoaren biodibertsitatearen berri emateko.
Txangoa Grankanto eta San Juanarri harkaitzetara
Erakusketaz gain, Jaizkibelgo itsasertza eta bertako geoformak ezagutzera eman asmoz, irteera antolatu dute martxoaren 31rako, Grankato eta San Juanarri izenez ezagunak diren harkaitzetara. Bi topagune iragarri dituzte irteerara bildu nahi direnentzat; 09:30ean Donibaneko Ubera bibliotekan, edota 10:00etan Jaizkibelgo goiko kantinan.
10 urtetik gorako pertsonentzako irteera da, eta ibilbidea zailtasun ertainekoa denez, mendiko botekin joatea gomendatzen dute. Hamaiketakoa eramatea ere komeni da.
Ipuin kontaketak eta hitzaldia
Hitzaldi bat ere izango da, Aitziber Sarobe biologoak gidatuta Ulia, Jaizkibel Itsas babesa. Zertarako? zein funtzio? izenburupean. Pasaia inguruko itsasertzaren kontserbazioaren gainekoak hartuko ditu hizpide ekosistemetan adituak. Hitzaldia apirilaren 11n izango da, 19:00etan, Donibaneko Ubera bibliotekan.
Baina hori baino lehen, ipuin kontaketak izango dira lau liburutegietan, Irene Sotelo Brunen eskutik, Jaizkibel: altxorrak eta mehatxuak izenburupean.
- Antxoko liburutegian: hilaren 26an.
- Trintxerpeko liburutegian: hilaren 27an.
- San Pedroko liburutegian: apirilaren 2an.
- Donibaneko liburutegian: apirilaren 3an.
Ipuin kontaketa guztiak 17:30ean izango dira.
