EuskoTren Ligari uko egin dio San Juanek
Liga horretan aritzeko araudia ezin izan du bete klubak. ETE Ligan arituko da azken bost EuskoTren Ligak eta Kontxak irabazi dituen 'Batelerak' ontzia.
Batelera gazteak, larunbateko Orioko jaitsieran. Argazkia: Josu Z. San Juanen emakumeen trainerua, Batelerak, ez da EuskoTren Liga arituko sasoi honetan, Emakumeen Traineruen Elkartearen Ligan baizik (ETE). Zuzendaritzak, arraunlariek eta laguntzaile teknikoak hartu dute erabakia, “araudian gutxieneko diren baldintzak ezin betetzeak erabaki hau hartzera eraman gaitu”. Azken bost EuskoTren Ligak eta Kontxak irabazitakoak dira iazko urtera arte Batelerak ontzia osatu zuten emakumeak. Aurten zeharo eraberritu behar izan dute emakumeen ontzia. EuskoTren Ligak albistea baieztatu du.
Gaur arratsaldean jakinarazi du arraun elkarteak Batelerak ez direla ariko emakumeen arraunaren mailarik gorenean, “indartuko gaituen atzera pausoa” izenburuarekin zabaldu duten oharrean: “Batelerak proiektu berri bati hasiera emango diogu, denbora gutxian maila gorenera itzultzeko asmoarekin”.
Guruzne Azpiroz Bateleren entrenatzaileak BERRIA egunkariari urtarrilean adierazi zionez, Gazte Mailako zazpi arraunlari eta beste zortzi gazteago zituen urtarrilean. Inguruko arraun taldeek trainerua ea osatzen zuten begira ibili dira, ezingo balute haietatik arraunlariak erakartzeko. Baina ezinezkoa izan da.
Beraz, litekeena da Hondarribiak hartzea sanjuandarrek utzitako plaza EuskoTren Ligan.
