Indarkeria matxistarekin amaitzeko politika integralak eskatu dituzte
Haserre, nazkatuta eta "baboso" eta erasotzaile guztiak kaleetatik eta herritik kanporatzeko asmo irmoarekin azaldu da mugimendu feminista.
Azken eraso matxista salatu dute hamarnaka eta hamarnaka herritarrek. Hamarnaka eta hamarnaka lagun bildu dira Gernika plazara Oreretako Mugimendu Feministak deituta astelehenean Errenteria-Oreretan izan zen eraso matxista salatzeko. Haserre, nazkatuta eta “baboso” eta erasotzaile guztiak kaleetatik eta herritik kanporatzeko asmo irmoarekin azaldu da mugimendu feminista.
Nahikoa da Erasorik ez! zioen pankartaren atzean bildu dira, eta astebete atzera egin dute mugimendu feministako kideek Martxoaren 8an Errenteria-Oreretako emakumeek kaleak “harro eta indartsu ” hartu zituztela gogoratzeko, “bizitzak erdigunean jarriko dituen jendarte berri bat imajinatzeaz gain, izan beharko lituzkeen oinarriak ere perfilatu genituen”.
Azken eraso matxista salatu dute hamarnaka eta hamarnaka herritarrek.
Baina astebete ere pasa gabe, berriz ere kalera atera behar izan dutela esan dute amorruz, “nazka-nazka eginda Oreretan beste eraso matxista bat gertatu delako”. Pausu handi bat eman dutela sentitu arren, beren helburuetatik urruti daudela esan dute, “urruti emakumeon askatasuna eskuratzetik”. Horren harira, autodefentsa feministaren aldeko hautua berretsi dute erasoen aurrean, eta horretan jarraitzeko konpromisoa erakutsi dute indarkeria matxista behin betiko ezabatu arte. Argi diote: “Ez gara biktimak, ez gara subjektu pasiboak, eta ez gara instituzioetatik bultzatzen diren neurri asistentzialekin konformatzen”.
Bidea luzea dela badakite ordea eta indarkeria matxista errotik ezabatzeko polizia eta epaile neurri zigortzaileez gain, bestelako jarrera, ekintza eta neurri aldarrikatu dituzte gaurko elkarretaratzean berriro, politika erreal eta integralak, arazoaren muina identifikatuko duten neurriak, “politika integralik gabe ez delako aurrera pausurik izango. Prebentzioa behar dugu eta batez ere, ezarritako ordenua aldatzea”.
Kalea emakumeena
Espazio guztietan herritar libre izateko eskubidea aldarrikatu dute, “emakumeok eraldaketa bidean espazio guztiak hartu behar ditugu. Nonahi, noiznahi,nolanahi, bide eta espazio guztietan libreki mugitzeko eskubidea aldarrikatzen dugu”.
Ez dute kikiltzeko asmorik, ezta isilik gelditzeko intentziorik ere eta eraso bakoitza salatuko dutela berretsi dute gaur, berriro, “autodefentsan sakontzen jarraituko dugu indibidualki zein kolektiboki. Erasotzaileak izen abizenekin ezagutu, gure kaleetatik baztertu eta kanporatu arte ez dugu etsiko”.
Txalo zaparradarekin amaitu da elkarretaratzea.
