Korrikaren atarian antolatutakoen berri eman dute Pasai Antxon
Apirilaren 12an iritsiko da Korrika Pasaiara
Antxoko Korrika Batzordeko kideek prest dute euskararen aldeko lasterketari harrera egin aurreko egitaraua. Apirilaren 4ean irtengo da Korrika, Garestik, eta zortzi egun beranduago iritsiko da Pasaiara, apirilaren 12an. Egun horretara itxaron gabe, baina, lanean hasia da Antxoko Korrika Batzordea. Atzo izan zuten bilera, eta batzarra bukatuta eman zuten aurtengo Korrikaren atarikoetan antolatutakoen berri.
Hilaren 22rako programatu dute lehen jarduera, Kuadrillategiko gazteekin elkarlanean. Grafitia margotuko dute Ibaiondo pilotalekuan, arratsean.
Izen-abizen propioak ditu hurrengo jardueraren protagonista: Kontxita Beitia Oiarbide. Ikastolen sorraren egin zuen lan mardularengatik ezaguna, irakasle antxotarrak garai hartako giroaz hitz egingo du hilaren 25ean Txirrita AEK euskaltegira egingo duen bisitan. 10:00etan izango da solasaldia, publiko orokorrari irekita.
Lehiaketa gastronomikoa
Gastronomia izango da kultur egitarauaren beste osagaia. Hilaren 31n, igandea, Labore Egin Klika Gastronomia Lehiaketa izango da, 12:00etan, Gure Zumardian. Lehiakideek, lau laguneko taldeetan antolatuta (gehienez), entsalada ondu beharko dute Laborek erraztuko dituen osagaiak baliatuta. Parte hartu ahal izateko aurrez izena eman behar da, euskaltegira posta elektronikoz idatzita.
Lehiaketaren egun berean Korrikako arropa erosteko aukera egongo dela iragarri du, bide batez, Korrika batzordeak, eta zehaztu duenez, egun horretan bertan hasiko dira antolatuko duten Tonbolarako txartelak saltzen. Apirilaren 4tik aurrera barrutiko hainbat tabernetan erosi ahal izango dira txartelak.
Zehazteke, oraingoz, apirilaren 12ko egitaraua. Hala ere, Korrika batzordeak aurreratu duenez, egun osoko egitaraua ontzen ari dira, eta iragarri dute Korrika Txikia egun horretan bertan irtengo dela, 15:30ean.
21:00etan iritsiko da Antxora Korrika, Altzatik, eta hura iritsi bitartean, baita herria zeharkatu ondoren ere, barrutian festa giroa bermatuta egongo dela agindu dute batzordeko kideek.
