Laponiako samien ordezkaritza bat Albaolara heldu da
Laponiako kultura eta kantu inprobisatua ezagutzeko aukera eskainiko du Kultur Faktoriak
Samien ordezkaritza bat Mintzola bisitatu zuenekoa. Argazkia: Mintzola. Sami herria ezagutzeko aukera izan duten hainbat euskaldunen ekimenez, Laponiako sami herriaren ordezkaritza bat Euskal Herria heldu da datozen egunotan. Beren kultura gurean ezagutzera eman asmoz, iniziatibaren sustatzaileek hainbat jarduera antolatu dituzte, horietatik azkena, Pasaian, Albaolaren Kultur Faktorian, hilaren 23an.
Nairobitarrak-eko kide Josu Iztuetak Arrastoan dokumentala aurkeztuko du San Pedroko ontziolan, eta jarraian Laponiako Joik inprobisatzaileek (Sami herriaren kantu inprobisatua da Joik), Beñat Gaztelumendi eta Maialen Lujanbio bertsolariak lagunduta kantatuko dute Albaolan. 18:30ean hasiko da jardunaldia.
Datorren astean, Pasaiara iritsi aurretik Tolosan izango dira samiak. Han ere hainbat jarduera antolatu dituzte beren kultura ezagutzera eman asmoz. Ikus, hemen, egitaraua egitaraua osorik.
Sápmi (edo Laponia) Finlandiaren, Norvegiaren, Errusiaren eta Suediaren artean zatitutako herrialdea da, estaturik gabea. Sami herria da laponiarren jatorrizko izena. Samiak betidanik bizi izan dira han, baina, gero eta iparralderago mugitu behar izan dute Norvegiak, Suediak, Finlandiak eta Errusiak bere lurraldea kolonizatu dutelako.
Sami hizkuntzak, Eskandinaviako gainerako hizkuntzak ez bezala (suediera, norvegiera eta daniera germaniar jatorrikoak dira, nahiko antzekoak eta ulergarriak euren artean) lotura du hungarierarekin, estonierarekin eta suomiera edo finlandierarekin, familia berekoak baitira.
Samiera lurralde handian dago hedatuta eta lauzpabost dialekto ditu, nahikoa ezberdinak euren artean. Sami herria kolonizatu izanaren ondorioetako bat da hizkuntza galtzea, nahiz eta adituek diotenez hizkuntzen babesari dagokionez beren politikak eredugarriak izan.
