Ordutegi zabalagoa izango du Galtzarabordako kiroldegiak
Astean zehar 06:30ean zabalduko ditu ateak Galtzarabordako kiroldegiak apirilaren 1etik aurrera; igande eta jai egunetan arratsaldez ere zabalik izango da Galtzarabordako kiroldegia.
Legorburu eta Txasko gaurko agerraldian. Serviociorekin hamar urterako sinatutako kontratua amaitu ondoren, Errenteriako Udalak lehiaketa publiko bidez esleitu dio kirol ustiapena kudeatzeko zerbitzua BPXPort Kirol Zerbitzuak enpresa gipuzkoarrari. Kontratu berria apirilaren 1ean sartuko da indarrean, eta zerbitzuaren antolaketak ez duela aldaketarik izango, kudeaketari dagokionean, azaldu dute gaur goizean egin duten agerraldian Jon Txasko Kirol zinegotziak eta Jose Cruz Legorburu zinegotziak: “Tarifa bakarreko sistema eta ikastaroetarako zirkulazio askea mantenduko dira Galtzarabordako eta Fanderiako instalazioetan, eta prezioak ere bere horretan mantenduko dira.
Egun ari diren langileek ere jarraituko dutela, “subrogazioarekin”, azaldu dute Txaskok eta Legorburuk. Kudeaketa eta prezioetan ez da aldaketarik izango, bai ordea ordutegian, hura zabalagoa izango delako Galtzarabordako kiroldegiaren kasuan apirilaren 1etik aurrera. Zehazki, igande eta jaiegunetan zabalik izango da. Orain arte goizez ematen zuen zerbitzua asteburuetan, baina apirilaren 1etik aurrera 16:00etatik 20:00etara ere izango da zabalik, udan izan ezik.
Astegunetan ere izango da aldaketarik ordutegiari dagokionean. Izan ere, orain arte 08:00etan zabaltzen zituen ateak, eta apirilaren 1etik aurrera 06:30ean zabalduko ditu. Larunbat, igande eta jaiegunetan ere aurreratu egin dute irekiera ordutegia goizez, eta 09:00etan beharrean 08:00etan zabalduko ditu ateak. Larunbat arratsaldeko ordutegia ere zabaldu dute, 22:00etan itxiko da, 21:30ean itxi ordez.
Aldaketa erabiltzaileen eskaerari erantzun asmoz egin dutela azaldu dute, eta aldaketek federatuen esparruko lehiaketa beharrak asetzeko eta eskola kirolaren ordutegi eskaintza zabaltzeko aukera emango duela diote Txaskok eta Legorburuk, “esparru pertsonalean, eguneroko zereginak kirola egitearekin bateratu nahi dituztenei aukera zabalagoa eskainiko die. Familiei dagokienean aisialdiko eta jarduera fisikoko eskaintza zabalduko du”, erantsi du Txaskok.
Urtebeterako sinatuko du kontratua udalak BPXPort enpresarekin, beste urtebete luzatzeko aukerarekin, “epe hori baliatuko da aldaketen bilakaera aztertu eta zerbitzua baloratzeko, hurrengo lizitazioa aurreikusten baita epe luzeagorako izatea”.
Kirol instalazioen ordutegi berrien eta egutegiaren xehetasun guztiak, ondoko PDF artxiboan.
