Ama izan nahi duelako Prost tabernak langile bat kaleratu duela salatu du LABek
Kasua iritzi publikora ekartzeaz gain, juridikoki ere salatu du sindikatu abertzaleak
LAB sindikatuak salatu duenez, Antxoko Prost tabernak emakume bat kaleratu du ama izan nahi duelako. Zehaztu dutenez, tabernako jabeek bi langile bikote zirela jakin zutenetik harremana zeharo kaskartu da eta duela aste batzuk, langileetako bat ugaltze prozesuan murgildu zela jakin zutenean, beste langilea kaleratu egin dutela gaitzetsi dute.
Kaleratzea gertaera larritzat jo du LABek, eta horregatik, kasua iritzi publikora ekartzeaz gain epaitegietara eramatea erabaki du. “Jendarte honek, ez ditu gure bizitzak erdigunean jartzen uzten, ez digu gure bizitza laborala gure familia bizitzarekin uztartzen uzten. Hona hemen kontziliazio neurrien porrota”, salatu du sindikatuak, eta orokorra den arazoa ostalaritzan are larriagoa dela ohartarazi dute, “lan baldintza prekarioak onartzera behartuak lanpostua mantentzearen truke, eta bizitza pribatua zeharo baldintzatuz ordutegi malgu eta bukaezinekin”.
LABen arabera, “kasu honetan botere harreman eta harreman hierarkikoa gurutzatu dira, nagusikeriaz ama izan nahi duen langile bat kaleratuz”, eta “halako kasu bat bera ere ez duela pasatzen utziko” ohartarazi du, salaketak ipintzen dituzten emakumeak babestuko eta lagunduko dituztela gaineratuz.
Kaleratzea epaitegietara eraman duten arren, kasu honetan LABek ez du langilearen itzulera eskatuko “ez dutelako nahi emakumea halako jabekin lan egiterik nahi”.
Azkenik, “Prost tabernari planto” egingo diotela eta “sindikalismo feminista indartzen” jarraituko dutela agindu dute, “eredu berri bat eraikitzeko, non lantokiak gune libreak izango diren, indarkeria matxistarik zein diskriminaziorik gabeak”.
