Udaberriz jantziko da Zumardia
Lore eta Landareen Azoka berezia egingo dute 11. aldiz. 09:00etatik 14:00etara egingo dute Zumardian, eta hemeretzi parte hartzaile izango dira.
Lore eta landare azokaren hamargarren aldia egingo dute zumardian. Errenteriako XI. Lore eta Landareen Azoka berezia egingo dute larunbatean Errenteriako Udalak, Behemendi Landa Garapenerako Elkarteak eta Dekolore elkarteak. 09:00etan zabalduko dituzte postuak eta 14:00ak arte izango da zabalik azoka, eta bertan hemeretzi postu izango dira. Horietatik bederatzi, lore eta landare ekoizleen postuak izango dira.
Azokan parte hartuko duten landare haztegien artean, landare mota bereziak ekoizten dituztenak ere izango direla zehaztu dute antolatzaileek; besteak beste, landare karniboroak eta kaktusak nabarmendu dituzte, baita, landare zukutsuak ekoizten dituzten bi haztegi ere. Lore eta landareen postuez gain, kosmetika naturala, sendabelarrak, haziak eta lore lehorrekin egindako artisau lanak, eta azoka horretan lehenengoz parte hartuko duen Aleka Elkartearen nekazaritza agroekologikorako hazien ekoizpenerako sarearen postuak ikusteko aukera izango da.
Azoka zabalik den artean, gainera, haurrentzako jokoak izango dira Zumardian bertan eta bi tailer ere antolatu dituzte: Lore prentsatuekin haurrentzako tailerra 11:30etik 12:30era; eta haurrentzako landaketa tailerra, 12:30etik 13:30era.
