Hitzaldi zikloarekin dator Euskara Talaia
Egungo euskal musika, ipuin kontaketa eta euskararen egoera landuko dituzte hitzaldi zikloaren barruan Talaia Euskararen eskutik.
Lezo Herri Eskolako eta Lezo Institutuko Euskara Talaiak hitzaldi zikloa antolatu du. Gaur egingo du hitzaldi sorta horren artetik lehena 15:00etatik 16:30era, Gaur egungo euskal musikarekin konektatzen goiburuarekin. Leire Aldai eta Artizar Mikeo Lezo Herri Eskolako ikasle ohiak izango dira dinamizatzaileak, eta bertaratzen direnei gaur egun irratian, tabernetan, jai giroan punta puntan dagoen euskal musikaren berri emango diete. Pendrivea emateko eskatu dute saioak irauten duen bitartean euskal musika grabatuko dietelako parte hartzaileei gero etxean, autoan edo nahi duten lekuan euskal musika familian entzuteko.
Datorren asteartean izango da bigarren hitzaldia (hilaren 26an). Nola kontatu ipuinak seme-alabei tailerra emango du Mikel Susperregik. Bertan ikasitakoarekin erronka jarri diete gainera animatzen diren gurasoei eta apirilaren 2an gelaz gela ipuinak kontatzera animatu dituzte. 15:00etatik 16:30era egingo dute tailerra.
Lehenengo bi tailerrak Lezo Herri Eskolan izango dira.
Kike Amonarriz izango da hirugarren hitzaldian dinamizatzailea. Soziolinguistarekin euskara bidegurutzetik ateratzen saiatuko dira Gezalara apirilaren 4an bertaratzen direnek. Modu atseginean, seriotasunez baina baita umorez ere arituko dira euskararen egungo egoeraz eta etorkizunaz, eta Lezon zein Euskal Herrian euskararen aldeko dinamikak berraktibatzearen gainean. 17:30ean izango da hitzaldia. Ondoren, 21. Korrika hasiera ospatzeko askaria izango da.
