[Bideoa] Aiton-amonei, esker onez
Orereta Ikastolako BDH 4ko ikasleek 'Baga, Biga Higa' emanaldia eskaini diete herriko adinekoei
Ahozko literaturaren gainean ikasturtean zehar ikasi duten guztia partekatzeko, Orereta Ikastolako DBH 4ko ikasleek Baga Biga Higa ikuskizuna taularatu zuten atzo Niessen kulturgunean. Publikoan, aiton-amonak eta herriko adinekoak, haiekin pentsatuta eta haiei propio eskainitako jaialdian.
Kopla zaharrak, bertsoak, dantza, sinbolismoa, garai bateko poesia soziala eta egungoa… denetarik ikusi eta entzun ahal izan zen. Oholtza gainean, ikasleak, ganora handiz, errezitatzen, antzezten, interpretatzen eta dantzatzen; eta publikoan aiton-amonak, eskertuak, harro, hunkituak… ziurrenik, asko eta asko, etxeko txikiak konturatzerako handitu egin direla pentsatuta.
Elkarrekin kantatuz eman zioten bukaera jaialdiari.
