Migrazioaren aldeko jardunaldia antolatu du gaurko Txerrimuñok
Harrera talde bat lanean hasia da Lezon, migratzaileak lagundu eta gaiaren gaineko sentsibilizazioa zabaldu asmoz.
Goizetik aritu dira gaur, migratzaile, bertako eta harrera taldeetako mugaz bi aldeetako lagunak elkarlanean jardunaldia prestatzen. Migratzaile eta errefuxiatuen aldeko jardunaldia antolatu dute gaurko Txerrimuñon. Bada denbora bat udalerrian Harrera Taldea antolatua dutela eta bi migratzaile ere hartu dituzte Txerrimuñon, beren egoera normaldu bitartean lagundu eta babesa eman asmoz.
Irungo eta Baionako harrera taldeekin elkarlanean ari dira lezoarrak, eta elkarrekin antolatu dute baita ere gaurko jardunaldia.
Afrikaren kolonizazioren gaineko erakusketa bat ondu dute Txerrimuñoren kanpoaldean, panelen bitartez, eta bisita gidatu izan da gaur goizean.
Harrera sareari buruzko hitzaldi bat ere izan da ondoren, mugaz bi aldeetara lanean ari diren harrera taldeen kideen partaidetzarekin, eta hitzaldia bukatzerako, berriz, otordu afrikarra prestatzen jardun dira goizean zehar.
Musika eta dantza afrikarrarekin emango dute bukatutzat gaurko jardunaldia, baina ez harrera talderen lana. Migratzaileei babesa eskaintzeaz harago, jendartean gaiarekiko sentsibilizazioa sustatu nahi dute, populismo eskuindarrak xenofobia hauspotzeko egiten duen lanari elkartasunetik erantzunez.
