Aniztasunaren Jaia inoiz baino bereziago
Aniztasunaren Jaia egingo du Koldo Mitxelena ikastetxeak larunbatean; Oarsoaldeko ikastetxe publiko guztien artean antolatu dute.
Kultur Aniztasunaren festa Koldo Mitxelena Ikastetxean. Argazkia: Koldokide Aniztasunaren Jaia egingo du Koldo Mitxelena ikastetxeak larunbatean (hilak 30). Hainbat urte darama bertako hezkuntza komunitateak jai hori egiten, baina aurtengoa berezia izango dela jakinarazi dute, Oarsoaldeko ikastetxe publiko guztien artean antolatu dutelako. Horren arrazoia, ekainaren 2an Errenteria-Oreretan ospatuko duten Euskal Eskola Publikoaren Jaia da. Makina bat taupada leloarekin lehenengoz ospatuko da Errenteria-Oreretan, baita Oarsoaldean ere, eta jaia heldu aurretik hainbat ekintza elkarlanean antolatzen ari dira Oarsoaldeko eskola publikoak.
Aniztasunaren Jaiari begira goizean hasi eta eguerdira arteko egitaraua atondu dute. Ipuin kontalariak, txotxongilo, panpina, eta eskulan tailerrak, Afrikako jantzien erakusketa eta taloak izango dira. Tailerrak gainera trikitilariek girotuko dituzte. Hainbat herrialdetako jakien dastaketarekin amaituko dute jaia.
Koldo Mitxelena ikastetxeak parte hartzera animatu ditu Errenteriako zein Oarsoaldeko gainontzeko udalerrietako herritarrak.
Egitaraua
- 10:30-11:30: Ipuin kontalaria
- 11:30-13:00: Tailerrak. Txotxongiloak, panpinak, eskulanak, Afrikako jantzien erakusketa, taloak. Tailerrek iraun bitartean trikitilariek girotuko dute jaia.
- 13:00-13:30: txalaparta.
- 13:30-15:00: Hainbat herrialdetako jakien dastaketa.
