Korrika bero iritsiko da Lezora, Korrika Kulturalagatik
Korrika Lezora iritsi baino lehen, AEKren herri iniziatiba girotzeko hainbat ekitaldi egingo dituzte herrian, Lezoko Korrika Batzordeak antolatutakoak.
Miren Amuriza eta Alaia Martin, igandean, Txerrimuñon bertsotan. Hilaren 12ko gauean iritsiko da Korrika Lezora. Egun horretan, aurretik, goizean Korrika Gaztea, arratsaldean Korrika Txikia, eta arratsean bestelako ekitaldiak —aurrerago zehaztuko ditu HITZAk— egingo dituzte. Baina Korrikaren egun handia iritsi arte, izango da Korrika girorik herrian, Korrika Kulturalari esker. Lezoko Korrika Batzordea emankor aritu da lanean.
Hitzaldiak, bertso saioa, sukaldaritza lehiaketa, Klikapotea, ikus-entzunezkoak. 21. Korrikaren Klika! ozen entzungo da herrian AEKren iniziatiba erraldoia iritsi aurretik ere. Jarraian, Lezoko Korrika Kulturalaren egitaraua:
- Hilak 31, igandea. 11:00etatik aurrera, Gurutze Santuaren plazan, Korrikako arropa salgai, kuestazioa, muxikoak…; 17:00etan, Txerrimuñon, Euskalgintza eta feminismoa bertso saio berezia Miren Amuriza eta Alaia Martin bertsolariekin. Gai jartzailea: Danele Sarriugarte.
- Apirilak 4, osteguna. 17:00etan, udaletxean, Garesen Korrika hasiko delako suziriak eta pankarta jartzea. Gora Korrika!; 17:30ean, Gezala Auditoriumean, Kike Amonarrizen hitzaldia Euskara Talaia elkarteak antolatua: Lezon ere euskara bidegurutzetik ateratzen.
- Apirilak 5, ostirala. 19:00etan, Karlos Saldise plazan, Labore. Egin Klika! gastronomiari sukaldaritza lehiaketa. Bitartean, Klikapote berezia herriko tabernetan.
- Apirilak 11, osteguna. 18:00etan, Kultura Aretoan, Txillardegiren klika dokumentalaren emanaldia. Ondoren, solasaldia Kote Camacho zuzendariarekin eta Miren Rubio Txillardegiren biografiaren idazlearekin.
