Agintaldiaren balorazio "positiboa" egin du Lezoko EAJk
Proiektu eta inbertsio garrantzitsuak egin badituzte ere, udal aurrekontuan 2,5 milioi eurotik gorako soberakina dagoela goraipatu dute.
Agintaldia bukatzear da eta Lezoko EAJ atzera begira jarri da balorazioa egiteko. Balantze “positiboa” egin dute jeltzaleek, esan dutenez, udaleko kontuetan 2,5 milioi eurotik gorako soberakina dagoelako – zehaztu dutenez, beraiek Udal Gobernu Taldera iritsi zirenean baino milioi bat gehiago-.
Hori guztia, “proiektu eta inbertsio garrantzitsuak gauzatuz” lortu dutela nabarmendu dute, bidenabar, jeltzaleek, eta sei proiektu nabarmendu dituzte garrantzitsuenen artean: “Herri Eskolako estaldura, bidegorria, Altamirarako sarbide eta biribilgunearen hobetzea, Gezalako aldagelak, kultur lokal berria, herriko lehen igogailua eta Elias Salaberria kalearen berritzea”.
Guztira, ia 3,5 milioiko inbertsioak egin dituztela goraipatu dute.
Jeltzaleen arabera, “zuhurtziaz eta zorroztasunez” kudeatu izanaren ondorioak dira, eta eta bide beretik lanean jarraitu ahal izateko udal hauteskundeetara begira herritarren babesa eskatu dute. “legealdi hau ondo egindako lanaren eta kudeaketa onaren adierazgarri izan da”, amaitu du Jesus Mari Martiarena alkategaiak, eta Lezon “aldaketari bidea eman”diotela ohartarazi du.
Gaineratu duenez “proiektu berriekin Lezoren etorkizuna bermatu” nahi dute, “Lezo hobe bat eraikitzen jarraitzeko, herritarren behar eta eskariei erantzunez”.
