Mugimendu feminista: "Ez gara belaunikatuko, hau guztia iraultzera goaz"
Hamarnaka lagun bildu dira azken erasoa salatzera Fanderia auzora. Patriarkatuaren karta-sorta haustera deitu du Oreretako Mugimendu Feministak parekidetasunak ez duela jada atzera bueltarik esanda.
Hamarnaka lagun bildu martxoan Fanderian izandako eraso sexista salatzeko. Hamarnaka lagun bildu dira Fanderiako topoko geltokiaren aurrean Oreretako Mugimendu Feministak gaur arratsaldean deitu duen elkarretaratzera. “nazkatuta” eta “nekatuta” azaldu dira azken eraso matxistaren aurrean, baina lehenik eta behin, elkartasuna eta “besarkadarik goxoena” helarazi diote erasotako emakumeari, bere familiari eta lagunei. Haserre eta feminismotik erantzuteko prest daudela esan dute eta bidea autodefentsa feminista dela, ez direlako biktima hutsak, ez direlako objektuak, “emakumeak oso indartsuak gara”.
Patriarkatuaren maitasun eredua arbuiatu dute, hark zirrikitu guztietatik sartu duela printzesa eta printzeen amodiozko pozoia salatu dute, eta pixkanaka, ia oharkabean gizartea usteltzen duela pozoi horrek erantsi dute: “Maitasunaren kontzeptu okerra jaso dugu, baina esnatzen ari gara, esnatu gara, nazkatu gara eta erne gaude. Sorginok aspaldi asmatu genuen maitasun osasuntsu eta aske baten bidean sendatuko gaituen edabea. Harremanak bizi eta ulertzeko feminismotik edan dugu eta maitasun erromantikoa errotik ezabatzera goaz”.
Erasotzailearen adinari erreparatu dio mugimendu feministak. 23 urte ditu. “Berdintasunean bizi garen ideia inozoak beste zartako bat eman digu, beste kolpe bat… Patriarkatuaren legeak indarrean jarraitzen du. Bere arauek belaunaldi belaunaldi irauten dute. Oraindik ere printze urdin ustelen menpeko izateko hezten gaituzte; oraindik gure gorputzak gureak izan ez daitezen hezten gaituzte, gizonek salba gaitzaten gure ahultasunetik…”.
Horrek mugitzen dituela erasotzaileak emakumeak erasotzea erantsi du mugimendu feministak, eta aliatuak eskatu ditu, beren maskulinitatea birplanteatzen duten bidelagunak , “beren harremanak feminismotik birplanteatzeko prest daudenak eta hortaz beren pribilegioei uko egiteko prest daudenak”. Patriarkatuaren karta-sorta haustera deitu du, azkenik, parekidetasunak ez duela jada atzera bueltarik esanda, “ez gaude emakume izateagatik bide saririk ordaintzeko prest, subjektu politikoak gara eta ez gara belaunikatuko bizi dugun errealitatearen aurrean. Hau guztia iraultzera goaz. Gure aldaketaren protagonista izango gara”.
