Pirinioetako Burdinaren Bidea, Xenpelar Etxean
Erakusketarekin batera jarduera osagarria antolatu ditu udalak, bi bisita gidatu, eta bi hitzaldi, zehazki.
Fanderiako Errota-Ibaiaren Etxeak larunbatean zabalduko ditu ateak. Piriniotako Burdinaren Bidearen gaineko erakusketa zabaldu dute Xenpelar Etxean eta apirilaren 13ra arte izango da zabalik. Joan den urte amaieran Errenteriako Udala Pirinioetako Burdinaren bidea sustatzen duen elkartera atxikitu zen. Elkarte hori, Pirinioetako burdinaren kulturaren eta tradizioaren inguruan azterketa, kontserbazio eta zabalkunde lan bateratua egiten du. Helburua, burdinarekin eta jarduera siderurgikoarekin lotutako ondarea eta kultura balioan jartzea da: meatzeak, burdinolak, artxiboak, arkitektura, betiere burdinaren munduarekin lotuta, Pirinioen bi aldeetan.
Pirinioetako Burdinaren Bidea Kataluniako, Andorrako, Frantzia hegoaldeko eta Araba, Bizkai eta Gipuzkoako 22 ondare eta turismo baliabideek osatzen dute, horien artean Errenteriako Fanderiako Errota Ibaiaren Etxeak. 50o urtez Erenterian industriak izan zuen indarra eta bilakaeraren erakusle da Fanderia. Uraren indarra baliatuta, XV. mendean Renteriola burdinolarako energia gisa erabiltzen zen, eta urteetara bihurtu zen fanderia, errota, eta irin eta pentsu fabrika. 1996an eten zuen industria jarduera eta XXI. mendean Ibaiaren Interpretazio Gunea bihurtu da ingurumen eta kultura ondarea kontserbatu eta ezagutarazteko.
Xenpelar Etxean zabalik den erakusketan Pirinioetako Burdinaren Bideko partaide diren baliabide guztiak ezagutzeko aukera izango da.
Erakusketaz gain, gainera, jarduera osagarriak antolatu dituzte. Igandean (hilak 31) bisita gidatua egingo dute Fanderiako Errotan euskaraz 12:00etan; apirilaren 2an, berriz, Bateriz Herrerasek Hierro en Gipuzkoa, historia y patrimonio hitzaldia emango du Xenpelar Etxean; apirilaren 4an, Fanderia la primera laminación de Gipuzkoa (siglo XVIII) hitzaldia emango du Mertxe Urteagak; eta apirilaren 7an, Fanderiako Errotan bisita gidatua egingo dute 12:00etan gazteleraz.
Xenpelar Etxeko erakusketa astelehenetik larunbatera bisita daiteke 17:00etatik 20:00etara.
