Prost tabernako langileek gezurtatu egin dituzte kaleratze baten gainean LABek esandakoak
LAB sindikatuaren arabera, Pasai Antxoko Prost tabernak langile bat kaleratu du ama izan nahi duelako. Tabernako langileek gezurtatu egin dute sindikatuak esandakoa, eta aldi berean, LABek bidalitako oharra zabaldu duten hedabideek egindako albisteei —HITZA tartean— “gaitzespen osoa” adierazi diete.
Zortzi langilek sinatutako agirian lau puntutan banatu dute euren iritzia. Hala, langilearen kaleratzea eragin duten arrazoiak “bestelakoak” izan direla azaldu dute, “gure lana ez da arrazoi horiek baloratzea edo epaitzea. Bakarrik egin nahi duguna da ukatu langilea ama izan nahi duelako kaleratu dutela”.
Langileek ziurtatu dute euren enpresan ez dela inoiz ere diskriminaziorik egon sexu, egoera zibil, sexu kondizio, edo ama edo aita izateko nahiagatik. Aldi berean esan dute enpresaren jarrera dela langileen egoera familiar eta pertsonalak kontuan hartuz lan egutegia egokitzea, “betiere lana eta familia kontziliazioa zainduz”.
Zabaldutako informazioak tabernako hamar langileen lanpostuen egonkortasuna “oso modu larrian” kaltetzen duela esan dute, adierazita horietatik zortzi emakumeak direla, “haien artean bi banandu eta ezkongabe bat daude, haien ardurapean lau seme-alaba daudela; bi emakume ezkonduk egiten dute lan, haurrekin; eta gizon batek lanaldi murriztua du haren seme-alaba adingabeak zaintzeko”.
