Su txikian, sari handi bila
Errenteria-Oreretako zein Oarsoaldeko elkarte gastronomikoentzat erreferente bihurtu den Gastronomia Erakusketaren XXXIV ekinaldia antolatu du Euskaldarrak elkarteak, eta apirilaren 1ean abiatuko dute.
Erakusketa gastronomikoaren aurkezpeneko irudia. Argazkia: Carrera Lapiko arteko sortzaileen topagune bihurtuko da Euskaldarrak elkartea datorren astelehenetik hilaren 11ra arte. Errenteria-Oreretako zein Oarsoaldeko elkarte gastronomikoentzat erreferente bihurtu den Gastronomia Erakusketaren XXXIV ekinaldia antolatu du Euskaldarrak elkarteak, eta apirilaren 1ean abiatuko dute. 24 elkarte gastronomiko lehiatuko dira sari handiaren bila, eta sukaldean duten abilezia erakutsiko dute, mokadu berritzaile eta goxoak prestatuta, aukeran, goxoena, hori baita sariren bat eskuratzeko txartela emango diena.
Erakusketaren lehen egunean, Lore Txorta, Landare eta Hermanos Camino elkarteek hartuko dute Goiko kalean egoizta duen elkartearen sukaldea. Asteartean, Ostarte, Altzate eta Batasunak; eta asteazkenean Niessen, Beraun Bera eta Arditurrik. Astea amaitzeko, ostegunean Gau Txori, Txintxarri eta Ondarra elkarteak arituko dira nor baino nor.
Apirilaren 8an itzuliko da erakusketa, eta San Huberto, Bukagaitz eta Itsas Mendik hartuko dute lekukoa. Apirilaren 9an, Ixkulin, Yola eta Aldeguna arituko dira; apirilaren 10ean, Alkartasuna, Bi Errota eta Bizardia; eta azken egunean, apirilaren 11n, Euskaldarrak, la Armonia eta Lagunak.
Apirilaren 13an egingo dute erakustaldia amaitzeko afaria 21:00etan eta horren barruan egingo dute sari banaketa. Guztira sei sari banatuko ditu Euskaldarrak elkarteak: Irabazleak Mikelazulo garaikurra eskuratuko du, Errenteriako Udalak ematen duen garaikurra bigarren sailkatuak; Lekuzarra tabernak ematen duena hirugarren sailkatuak; eta Aralar tabernarena, laugarren sailkatuak. Sari berezia jasoko du kalitate-prezioa harreman onena duen platerak, De Cyne Reynak emanda; eta Elkartearen Plater Berezia sarituko dute Maria Antonia Zapirainek emandako garaikurrarekin.
Aipatutako egunetan 18:30etik 20:30era lehiatuko dira parte hartzaileak.
