Test serioa da
San Pedron traineruen estropada dago bihar, 16:30etik aurrera; goizean, Errenteria-Oreretan, batelak, Hibaikak antolatuta.
Udaberriko klasiko bat da, denboraldia hasi aurreko termometroa, elkarri neurria hartzekoa. San Pedroko X. Test Estropada bihar lehiatuko da, 16:30etik aurrera. Orotara, 47 traineruk parte hartuko dute lau txandatan banatuko den estropadan: hamar, Gazte Mailakoak eta Beteranoen mailetakoak dira, hamabi emakumeenak, eta gainontzeko 25ak gizonenak.Test serioa da. Euskal Herriko traineru onenak izango dira bertan gizonetan eta emakumeetan. Txantxa gutxi traineru sasoia hasteko bi hilabete eta erdi falta direlako.
Erlojuaren kontra lehiatuko dira traineruak, banaka, eta irteerak minutuero aginduko dira, Torretik irten eta bokalerantz. Gazteen, Beteranoen eta Nesken Senior mailetan lehiatzen direnek bi luze eta ziaboga bat osatu beharko dituzte, eta Senior mutilek lau luze eta hiru ziaboga. Txanda eta txanda artean, bost minutuko atsedenaldia izango da.
Lehen txandari San Juango gazteen traineruak emango dio hasiera, eta ondoren beteranoen eta emakumeen traineruak aterako dira; Elantxobe izango da irteten lehena bigarren txandan eta Getxoko traineruarekin amaitu da; hirugarren txandari, Donostiarra B ontziak emango dio hasiera eta San Juan A traineruak bukaera; azkenik, laugarren txanda, San Miguel Ligako ontziena, Astilleroko ontziarekin hasiko da, eta Bermeo traineruarekin amaitu.
Oarso Bidasokoak
Oarso Bidasoko hamar traineru izango dira bihar San Pedron. Gazte Mailan, bakarra, San Juan; emakumeetan hiru, Hibaika, Hondarribia eta San Juan; gizonen Senior Mailakoak dira gainontzekoak: San Pedroko, San Juango eta Hondarribia eta San Juan; gizonen Senior Mailakoak dira gainontzekoak: San Pedroko, San Juango eta Hondarribiko A eta B ontziak dira
Xuxa Urkiaren omenezkoa, bihar goizean
Batelen estropada egingo dute Errenteria-Oreretan, Oiartzun ibaian, bihar (10:30). Xuxa Urkia zenaren omenezko bosgarren estropada izango da zehazki, Hibaikak antolatua. Zumardiko lehenengo zubitik Iztietako pasealekuaren bukaerako oinezkoen zubiraino helduko da estropadaren ibilbidea. Emakume zein gizonen Haur, Kadete, eta Gazte mailetako ontziek erlojupekoan egingo dute lehia. Gipuzkoako Batel Ligaren barrukoa da.
