[Emaitzekin] Amildegiaren ertza hurbilegi du Allerruk
Allerruk ezin izan du sailkapenean atzean duen Deusto Donostiaren zelaian punturik lortu. Bi akatsek galtzera kondenatu dute.
Akats larriak egin zituen defentsan Allerruk. Bi jokaldi ustel, eta bi gol. Bitan lo hartu, eta galdu. Defentsako bi akats, eta hondamena. Allerruren gizonen talde nagusiak 2-0 galdu egin zuen Deusto Donostiaren zelaian, Zubietan, larunbatean. Erregional Ohorezko Mailako 15. postuan dira orain lezoarrak, jaitsiera postuetan dauden Deusto Donostia eta Añorga baino hiru puntu aurretik bakarrik. 18.a, Hondarribia, jada mailaz jaitsi da. Liga bukatzeko sei partida falta dira. 18 puntu daude jokoan. Dozena erdi norgehiagoka horietako bakoitza finala izango da Allerrurentzat. Lehena, larunbatean eta Plazetan, laugarren den Amaikak Baten kontra. Latza partida.
Otsailean ez zuen partidarik galdu Allerruk. Martxoan ez du bat ere irabazi; berdinketa bakarra lortu du, aurreko jardunaldian, Oiartzunen kontra eta etxean. Otsailean maila erraz samar mantenduko zuela zirudienean, dinamika zeharo aldatu du futbol talde lezoarrak eta behera, beheregi begira jarri da. Larunbatean, lehen zatian nolabaiteko nagusitasuna azaldu zuten lezoarrek, nahiz eta golik ez egin. Baina 51. eta 76. minutuetan, ulertzeko zailak diren arrazoiengatik, kontzentrazioa galdu eta bi gol jaso. Apirila da, ligak behin betiko erabaki daitezkeen hilabetea. Beste otsaila bat bilaka dadila apirila Allerrurentzat.
Bestelako emaitzetan, gizonen Munttarpek bereari eutsi dio asteburu honetan ere, Egiari 29-33 irabaziz. Emakumeen taldeak oso puntu baliotsua lortu zuen Bekoerrotan Leizaran indartsuaren kontra 20na berdinduta.
Areto futbolean, Jaixkiren lehen posturako sua itzaltzen ari da, bana egin zuelako Laubururen etxean, eta bere goiko kontrarioek irabazi zutelako. Hirugarren da orain Jaixki sailkapen nagusian, eta igoeraren alde borrokatzeko aukera asko ditu. Gaintxuk aspaldiko partez irabazi egin zuen etxean.
Hona hemen Lezoko kirol talde nagusiek asteburuan izan dituzten emaitzak:
FUTBOLA
Gizonen Erregional Ohorezko Maila
- Deusto Donostia-Allerru 2-0
Emakumeen Gorengo Maila, Kopa
- Allerru-Intxurre 9-0
Gizonen Gazteen Ohorezko Maila
- Allerru-Kostkas 0-1
Gizonen Gazteen Lehen Maila, Kopa
- Orereta Kafea-Allerru 0-2
ESKUBALOIA
Gizonen Gipuzkoako Lehen Maila
- Egia-Munttarpe 29-33
Emakumeen Gipuzkoako Liga, Igoera Fasea
- Munttarpe-Leizaran 20-20
ARETO FUTBOLA
Gizonen Gipuzkoako Lehen Maila
- Gaintxu AFT-Legorreta 7-4
- Lauburu Berrobi-Jaixki AFT 1-1
SASKIBALOIA
Gizonen Gipuzkoako Hirugarren Maila
- Astigarraga Mundarro-Kurkubi SBK 66-55
