Eskola Feminista hiru ikastaro berrirekin dator
Autodefentsa feminista, desprintzesatze tailerra, eta midfulness eta emozioen kudeaketa tailerrak antolatu ditu hilabete honetan hasi eta ekainera arte Eskola Feminsitak.
Emakumeen Etxean izango dira ekintzak. Udaberria heldu da, eta horrekin batera hiru ikastaro berrirekin dator Eskola Feminista. Autodefentsa feminista, desprintzesatze tailerra, eta midfulness eta emozioen kudeaketa dira tailer horiek. Maiatzaren 11n egingo dute autodefentsa feminista tailerra, eta helburua, erasoak identifikatzea eta indarkeria nola sortzen eta eraikitzen dena aztertzea da. Eguneroko bizitzan jasaten diren eraso egoerei erantzuteko mekanismoak eta ekintzak bilatuko dituzte. Euskaraz izango da Emakumeen Etxean 10:00etik 14:00etara eta 15:30etik 19:30era.
Desprintzesatze tailerra maiatzaren 16tik ekainaren 13ra egingo dute, ostegunetan, 18:00etatik 20:00etaram, gazteleraz. Horiek ere, Emakumeen Etxean. XXI mendean emakumeak ez dutela bizitza dorre batean ematen printze bat etorri eta salbatuko dituen esperantzarekin diote antolatzaileek, baina badirela prinztesa izateko esperantzara eramaten duten dinamika sozial asko. Dinamika horiek emakume izatearen inguruko bizipenari nola eragiten dioten landuko dute parte hartzaileek, eta tresnak eskainiko dira norberak askatasunez izan nahi duen emakumea izatera nola iritsi lantzeko.
Osasun eta oreka emozionala lortzeko tresnak bereganatuko dituzte midfulness tailerrean. helburua: momentua bizitzen ikastea, eta adimen osasuntsu eta positiboa sortzea. Hilaren 4tik ekainaren 6ra bitartean egingo dute tailerra 15:00etatik 16:30era ostegunero, gazteleraz, Emakumeen Etxean.
Azalean sexu aholkularitza, Emakumeen Etxean ere
Azalean Sexu Aholkularitza zerbitzua Emakumeen Etxean eskainiko dute gainera, hilabeteko bigarren ostegunetan 18:00etatik 20:00etara. Halaber, orain arteko ikastaro eta taldeek martxan jarraitzen dute. Honakoak dira ikastaroak: Autodefentsa feminista (talde egonkorra); Emakumeak errebeldia alaian; Munduko emakumeen literatura; Emakumeak eta osasuna; Zure burua maitatzen ikasi: autozaintza.
Indarkeriarik gabeko bizitzaren aldeko emakumeak eta Emakume zaintzaileentzako topagunea ere martxan dira.
Ikastaro guztiak doakoak dira eta zabalik da izena emateko epea. Horretarako Zu! Zure udala zerbitzura jo behar dute interesdunek, edota posta elektronikora mezua bidali.
bestalde Emakumeen Etxea zabalik dagoela gogora ekarri dute astelehen eta ostiraletan 09:00etatik 13:00etara eta astearte eta ostegunetan, arratsaldez, 16:00etatik 20:00etara. Honakoa da telefono zenbakia: 943 449 630. Posta elektronikoz ere egin daiteke kontsulta.
