[Agendarekin] Plazetak bultzatu behar du Allerru
Plazetak lan garrantzitsua du bihar: jokalariek azalduko duten grinari, unerik latzenetan ere, babesa ematea. Maila du jokoan gizonen Allerruk.
Allerruko hainbat zale, artxiboko irudian, Plazetan. Martxo beltza ahazteko, apirileko lehen jardunaldian emaitza positiboa behar du Allerruren gizonen talde nagusiak. Eta emaitza positiboa esaten denean, garaipenaz ari gara. Erregional Ohorezko Mailari eusteko partida oso garrantzitsua du Allerruk bihar (larunbata) 16:00etan Plazetan, sailkapenaren goialdean dagoen Amaikak Bat (laugarren dira) taldearen kontra. Jokalariek zelai barruan eragin behar dute, baina Plazetak, hau da, lezoarrek, bultzatu behar dituzte garaipenera zuri-berdeak.
Martxoan Allerruk ez du partidarik irabazi. Eta adibidez, sailkapenean ondoan dituen bi talderen zelaian galdu egin du, Real Union B eta Deusto Donostia (aurreko jardunaldian). Burua reseteatu behar dute jokalariek, aurreko jardunaldietan gaizki egindakoetatik ikasi, eta beste guztia ahaztu. Garbi iritsi epaileak partida hasteko egingo duen txistukadara. Beharrezko tentsioarekin bakarrik. Hori horrela bada, eta Allerruk egiten dakiena egiten badu, bihar eta liga bukatzeko falta diren gainontzeko bost jardunaldietan onurak besterik ez ditu jasoko taldeak. Eta gailurrera arnas betean iritsiko da, salbazioa eskuan. Hori bai, beti, zaleak ondoan dituela.
Eskubaloian, gizonen Munttarpek ligako azken partida izango du jokoan. Hiru aste dira liga irabazi eta igoera faserako txartela lortu zutela lezoarrek. Baina hala ere, irabazten jarraitu dute. Derbia dute igandean (11:30ean, Bekoerrotan) Donibane Eskubaloiaren kontra. Arrosak mailari eusteko borroka betean daude, 12 taldeko ligan 10. postuan, baina 11.erakin (Ormaiztegi) eta 12.arekin (Egia) 13na puntura berdinduta. Talde oso lehiakorra da Munttarpe, baina igoera faseari begira indarrak gordetzeko komeniko litzateke azeleragailuari asko ez eragitea… Jokalariek mezu hau ulertuko dute, ziur. Bestalde, Munttarperen emakumeen taldeak Egiara egingo du bidaia bihar arratsaldean (16:45), Euskal Ligarako igoera fasean urrezko bi puntu eskuratzeko asmoz.
Areto futbolean, Jaixki mailaz igotzeko borrokan beharrezko (oso) izango dituen hiru punturen bila joango da gaur Bekoerrotan, eskualdeko derbian. Oiartzun jasoko du 21:50an hasiko den partidan. Hirugarren dira lezoarrak Gipuzkoako Lehen Mailan, eta koska bat gorago egiteko borroka horretan tinko mantentzeko aukera dute gaur. Gaintxuk, bestalde, lehiatzea eta ahalik eta puntu gehien pilatzea du helburu liga bukatzeko falta diren hiru partidetan. Eskuan du maila mantentzea, eta gora begirako aukerarik ez du. Beraz, gaur Herrikideren kontra Tolosan jokatuko duen partidan ohoreaz eta kirol lehia garbiaz harago (20:30ean da partida) ez du askoz gehiago jokoan Gaintxuk.
Honakoak dira Lezoko kirol talde nagusiek asteburuan dituzten partidak:
FUTBOLA
Gizonen Erregional Ohorezko Maila
- Allerru-Amaikak Bat, bihar (larunbata) 16:00etan Plazetan.
Emakumeen Gorengo Maila, Kopa
- Herrerako Sporting-Allerru, etzi (igandea) 11:00etan Herrerako futbol zelaian.
Gizonen Gazteen Ohorezko Maila
- Hondarribia-Allerru, bihar (larunbata) 16:30ean Hondarribiko Ondartza futbol zelaian.
Gizonen Gazteen Lehen Maila, Kopa
- Allerru-San Marcial B, bihar (larunbata) 18:00etan Plazetan.
ESKUBALOIA
Gizonen Gipuzkoako Lehen Maila
- Munttarpe-Donibane Eskubaloia, etzi (igandea) 11:30ean Bekoerrotan.
Emakumeen Gipuzkoako Liga, Igoera Fasea
- Egia-Munttarpe, bihar (larunbata) 16:45ean Egiako kiroldegian.
ARETO FUTBOLA
Gizonen Gipuzkoako Lehen Maila
- Jaixki AFT-Oiartzun, gaur (ostirala) 21:50an Bekoerrotan.
- Herrikide-Gaintxu AFT, gaur (ostirala) 20:30ean Tolosako Eskolapioetan.
SASKIBALOIA
Gizonen Gipuzkoako Hirugarren Maila
- Kurkubi SBK-Mondragon Unibertsitatea C, gaur (ostirala) 20:00etan Bekoerrotan.
