Hemen dira Herbeheretako ikasleak
Pasaia-Lezo Lizeoko ikasleen etxeetan dira, eskola trukean
Osteguna bitartean egongo dira Herbeheretako ikasleak Pasaian. Atzo iritsi ziren eta ostegunera bitartean izango dira Pasaian. Roermond hiriko Bisschoppelijk College Broekhin institutuko ikasleak Pasaia-Lezo Lizeoko ikasleen etxeetan dira, eskola trukean. Urtarrilean izan ziren Herbeheretan pasaitarrak, hango ikasleen etxeetan, eta orain orduko bidaia haren itzulera.
Kontent topatu ditu HITZAk batzuk eta besteak ostirala eguerdian, Donibaneko Yola elkartean, gurasoek mimoz prestatuko otordua dastatzera bilduta. Aurretik galtzak bete plan, ikasleek beraiek kontatu dutenez.
Sara Pozo Elizalde altzatarra San Meisters hartu du etxean eta Manex Kamiok Gamio antxotarrak Thymen Zwalve. Lauen testigantza bildu du HITZAk bazkalostean: “Arratsaldero egingo ditugu planak, Donostiara joan, mendian buelta bat eman…. kontatu du Sara Pozok eta irteeretan garrantzitsuenetakoa bihar dutela aurreratu du Kamiok, bihar: “Bilbora goaz bihar, Guggenheim ikustera”.
Ikasle euskaldunak ez bezala, holandarrek ez dute aurrez elkar ezagutzen. Horregatik taldean egiten dituzte jarduera gehienak, eta Herbeheretako ikasleak bereziki estimatzen duten kontu da, hemengo bizitza sozialarekin harrituta: “Hemengo bizimodua oso desberdina da”, dio Meistersek, eta ildo beretik, Zwalvek nabarmendu du “Manexek jende asko ezagutzen duela eta denen laguna dela. Zoragarria da”. Paisaia, jendearen arteko tratua… horiexek dituzte bereziki gustuko.
Thymen Zwalve, Manex Kamio, Sam Meisters eta Sara Pozo.
Gurasoen partaidetza ezinbestekoa
Ikasleekin batera, irakasleak eta gurasoak. Inexa Maritxalar eta Antxon Serras dira eskola trukearen arduradunak Pasaia-Lezo Lizeoan, eta biak bat datoz. Eskoa trukea “pizgarri oso garrantzitsua” izaten da ikasleentzat, eta gehienentzat “esperientzia ahaztezina”.
Hala gogoratzen dute orain baino lehen parte hartu duten ikasle eta guraso gehienek ere. Aurtengoan anfitrioi lanak egitea egokitu zaien gurasoetako batzuk lapiko artean topatu ditugu Yolan, lanpetuta baina kontent, auzolanean prestatu duten bazkaria izan duen harrerarekin kontent, eta beren seme-alabeekin esperientzia partekatu ahal izateaz harro.
Gurasoen partaidetza ezinbestekoa da eskola trukea aurrera ateratzeko; argazkian Yolako bazkaria prestatu dutenetako batzuk.
