Bakailaozko pintxorik onena non egiten duten erabakiko dute bihar
Gipuzkoako Bakailaozko Pintxo Txapelketaren Finala lehiatuko da bihar, zuzenean eta jendaurrean, Donibanen.
Bakailaoa da lehiaketara aurkeztu dituzten pintxo guztien osagai nagusia. Bihar (hilak 9), 16:00etik aurrera, Gipuzkoako Bakailaozko V. txapelketaren finalaz gozatzeko aukera izango da Pasaian. Herritar orori zabaldutako ekitaldian, finalera sailkatu diren 12 establezimenduetako ordezkariek, zuzenean prestatuko beharko dituzte lehiaketara aurkeztutako pintxoak. Donibaneko kulturgunean lehiatuko da finala, eta sarrera librea eta doakoa izango da. Erabakia 19:00ak inguruan emango du epaimahaiak.
Aurten Gipuzkoa osoko 39 establezimenduek parte hartu dute lehiaketan, tartean Pasaiako Prost, Erdibana, Izkina eta Ziaboga. Hamabi sailkatu dira finalera -bihar jakingo da zeintzuk- eta orain, “showcooking formatuan” lehiatu ondoren, onena zein den erabakiko dute.
