Head On, rock dotore eta iluna Txerrimuñon
Bretainiako taldeak lehen aldiz joko du Euskal Herrian
Rock&roll zaleak dira, Bretainiako Rennes hirikoak, eta lehen aldiz heldu dira Euskal Herrira jotzera. Ostiralean Bilbon joko du Head On, Shake aretoan, Hernaniko Bamms talde gaztearekin, eta larunbatean, berriz, Lezoko Txerrimuñon.
Head On izenak, bi erreferente ditu Renneseko musikarientzat: batetik, The Stooges talde mitikoaren kanta, eta bestetik Fathi Akinen filma.
Woman of wall izena du taldearen azken lanak eta horixe aurkeztera heldu dira. Adituen arabera, azken lan honetan “azeleragailua askatu” du taldeak, “kanten detaileetan atmosfera zingiratsuak sortuz”.
Lehen singlea 2010. urtean kaleratu zuen taldeak Ready to punch your face izenburupean, eta hortik aurrera bi urtero LP bana kaleratu du Head On-ek. Lehenik Blind Kiss, soinu aldetik krudelena; eta haren ondotik, Changing shape, Europa osoko rockzaleen gozagarri.
Rock dotore eta iluna, larunbatean, 20:30etik aurrera, Txerrimuñon.
