Aritz Salamanca: "Sekulakoa izan zen bideokliparen grabazioa"
Aritz Salamanca lezoarra, hainbat kide eta lagunekin batera, 21. Korrikaren abestiaren bideokliparen protagonistetakoa da.
Aritz Salamanca. Klika da 21. Korrikaren abestia. Eta bideoklipa ere badu. Bertan parte hartu du Aritz Salamanca dantzari lezoarrak, hainbat kiderekin batera. Baina Salamancak eta partaide den Tio Teronen Semeak taldeko kideek ez dute horretara bakarrik mugatu Korrikari emango diotena.
Klika-ren bideoklipean parte hartu duzu. Nolatan? Zer nolako esperientzia izan zen?
Kukai Dantzako kide baten eta Tio Teronen Semeen beste kide baten bidez jakin nuen bideoklipean parte hartzeko aukera zegoela. Kukaiko Jon Mayarekin hitz egin, eta aurrera egitea adostu genuen. Beste bi dantzarik parte hartzeko aukera zutela esan zidaten, beraz, Tio Teroneko Mederi Orbiso lezoarra eta Antxon Fernandez urretxuarra ere izan ziren filmaketan. Aritz Lasarguren dantzari bizkaitar laguna ere izan zen bertan. Grabazioa kristoren esperientzia izan zen.
Nolakoa izan zen grabazioa.
Egun oso batez Deustuko pabiloi handi batean egin genuen grabazioa. Kantua ezagututa, eta Fermin Muguruzarekin genituen ideiak kontrastatu ondoren, grabazio ezberdinak egin ziren, zazpi-zortzi. Gauza ia berbera egiten genuen, baina plano ezberdinetatik jasota. Hasieran, musika entzutean, iruditu zitzaigun ez zela erraza izango koreografia egitea. Baina materiala barneratuta, dena oso ondo joan zen. Grabazioan egon zen rolloa oso ona izan zen: Ferminek garbi zuen ideia, guk ere ekarpenak egin genituen, beste dantzariekin —break dantzariak— oso harreman indartsua sortu zen, eta lan egiten oso gustura egon ginen.
Baina zuen ekarpena ez da bideoklipera mugatuko. Hilaren 12an, Korrikaren egunean, kalean izango zarete.
Lezoko Korrika Batzordean parte hartu dut. Dantzarekin zer edo zer egin ote genezakeen esan ziguten; hortaz, Tio Teronen ildotik euskal dantza eta umorea uztartuz, eta jakinda egun ederra dela, herri guztia integratzeko Korrika aurreko herri beroketa bat egingo dugu. Dantza batzuetan guk parte hartuko dugu, beste batzuek inklusiboagoak izango dira.
Tio Teronekoak ganberro hutsak zarete, eta lekukoa eramango duzue. Ez duzue bahituko, ezta?
Ez! [barrez] Lekukoa sakratua da! Gainera, gure kideetako bat, Aritz Olaziregi, aspalditik dabil Korrikako furgonetak moldatzen, oso hurbiletik bizi du Korrika. Ganberroak gara, baina lekukoarekin horrelakorik egiteko adina ez!
