Saretzea, proiektu eraldatzaileen aliatu
Ekonomia sozial eta eraldatzaileen erronkari aurre egiteko saretzeek duten potentziala landuko dute jardunaldian, hiru ildo nagusi aztertuta.
Ostiralean antolatu du doako jardunaldia saretzearen gainean KoopFabrikak. Saretze prozesuak lurraldeak eraldatzeko jardunaldia antolatu du KoopFabrikak ostiralean (hilak 12) Errenteria-Oreretako Merkatuzarren, 09:30ean hasi eta 14:00ak arte. Ekonomia sozial eta eraldatzaileen erronkari aurre egiteko saretzeek duen potentziala landuko dute jardunaldian, hiru ildo nagusi landuta. Saretzea eta lan kolektiboaren papera ekintzailetzan izango da ildoetako lehena, eta horren barruan proiektuak noiz saretzen diren, saretze dinamikak nola abiatzen diren, zerk eragiten dituen eta saretzeak berak ekartzen dituen lorpenez arituko dira.
Teoriaz harago, praktika ere ezagutuko dute, lehen eskutik, jardunaldi horietan parte hartzen dutenek. Izan ere, esperientzien ezagutzari ere eskainiko dio tartea KoopFabrikak. Ekonomia sozial eraldatzailearen erronkak, izan duten ibilbidea, eta etorkizuna nola ikusten duten azalduko dute. Horretarako, hiru kooperatiben esperientzia bertatik bertara ezagutzeko aukera izango da: Elika, TaPuntu, eta Katakrak kooperatibena, zehazki.
Saretze dinamika izango da landuko duten hirugarren ildo nagusia. Sareak zer nola sendotzen dituen proiektu eraldatzaileak, azken horiek zein ekarpen egiten diten euren sareei, eta zerk biltzen dituen hausnartuko dute.
Jardunaldia Errenteriako Udalaren laguntza eta Gipuzkoako Foru Aldundiaren finantziazioarekin antolatu dute. Parte hartzea, berriz, doakoa da, baina izena eman behar dute interesdunek, eta horretarako, KoopFabrikaren webgunera jo behar dute eta formularioa bete.
Egitarua
- 09:30: Harrera
- 09:45: KoopFabrika eta saretze prozesuak
- 10:15: Esperientziak ezagutzea: Elika Kooperatiba, TaPuntu Kooperatiba, eta Katakrak Kooperatiba.
- 11:15: Atsedena
- 11:45: Saretze Dinamika
