'Zaharrak berri' emanaldia eskainiko die EMKEk Gabierrotako egoitzako adinekoei
Urtero egiten du kontzertua Gabierrotako adinekoen egoitzan EMKEk. Helburua, bertakoek musika banda lehen eskutik entzun eta ikustea da, beraien neurrira sortutako emanaldiaren bidez.
Musika Banda Madalen Eguneko kontzertuan. Zaharrak berri. Horrela du izena EMKE Errenteriako Musika Kultur Elkarteak larunbatean Gabierrotako adinekoen egoitzan diren aiton-amonentzat prestatu duen emanaldi sinfoniko korala. Hainbat musika arlo uztartuko ditu proposamen horrek, eta hala, Jesus Guridi eta Pablo Sorozabal euskal konpositoreak ardatz hartuta kontzertu egitarau interesgarria osatu du EMKEk.
Alain Aierdi Gurpegik zuzenduko du musika banda, eta ondoan izango du Klara Mendizabal soprano gaztea.
Urtero egiten du kontzertua Gabierrotako adinekoen egoitzan EMKEk. Helburua, bertakoek musika banda lehen eskutik entzun eta ikustea da, beraien neurrira sortutako emanaldiaren bidez: “Gehiagotan aipatu dugun moduan, kontzertua, gurea bezalako elkarte batek bete behar duen funtzio sozialean kokatzen da. Batzuetan kultur arloan gabiltzan elkarteak, sormen eta proposamen eszenikoen antolaketan murgiltzen gara, eta agian ez gara behar adina jabetzen aipatu funtzio sozial horretaz”. Kultura zabalkundea eta funtzio soziala eskutik helduta joan behar duten zalantzarik ez dutela azaldu dute EMKEren arduradunek, “kultura eta arlo sozialaren arteko lankidetza eta kolaborazio esparruak zabalduz”.
Kontzertua larunbatean izango da Gabierrotako adinekoen egoitzan, 12:00tan hasita.
