[Bideoa eta galeria] Dinokorrika harro egin dute Lezoko erretiratuek
21. Korrika Lezon egiten lehenak adinekoak izan dira. Dinokorrika egin dute. Harro, gogoz, ilusioz eman diote elkar lekukoa. Hunkigarria izan da.
Renfetik Gurutze Santuaren plazainoko bidea egin dute. Dinokorrika edo adinekoen Korrika, erretiratuena. Gaur eguerdian egin dute Lezon lehenengoz bizitzan esperientziadunen Korrika, Renfeko geltokitik Gurutze Santuaren plazaraino. Harro, pozik, ilusioz, gogoz… Adinekoak ere euskararen alde daude, eta AEK-k antolatzen duen iniziatiba handiaren parte sentitu dira gaur. Euskararen defentsan, mantentzean, transmisioan eta zabalkundean gogor lan egindakoak dira adinekoak garairik latzenetan ere, euskara jazartua zen garaietan ere. Eta gaurkoa, haiei aitortza izan da, 21. Korrikaren testuinguruan.
Euskal Herria euskalduntzeko egiteko lan asko dago oraindik egiteko, eta adinekoek azaldu dute bide horretan lagundu nahi dutela, esperientziatik, etorkizuneko herri euskaldunak izan nahi dituzte. Baita Lezo ere.
Jarraian, Dinokorrikaren bideoa eta argazki sorta.
