'Mari Itsasargia' igandean itsasoratuko da
Fatimako Andra Mariaren parrokian estreinatuko du Landarbasok bere azken ikuskizuna, itsasoari so eta emakumea protagonista.
Beren azken ikuskizuna estreinatuko du igandean Landarbaso abesbatzak, koroko zuzendari Iñaki Tolaretxipiren esanetan «asmoetan orain arteko handiena». Gaur goizean aurkeztu dute Mari Itsasargia, Ondartxon, Hibaika Arraun Elkartearen egoitzan, eta ez ausaz. Izan ere, Landarbasoren azken lanak, Elkanoren lehen mundu biraren 500. urteurrenean itsasoa baitu ardatz, eta emakumea protagonista nagusi.
Mari itsasargia ikuskizuna Maria Zozayaren omenez sortu du Maddalen Dorronsorok, Landarbasoko Dizdizka eta Kontari haur eta gazte abesbatzen zuzendariak. Aurkezpenean istorioaren egileak azaldu zuenez, “neskatxa abenturazale baten istorioa da”, 1610. urtean presondegian hil zen Errenteriako Maria Zozayaren omenez sortua. Ekaitza baten ondorioz hondoratu zen ontzi batean zihoazen 800 gizon hiltzea leporatu zioten Zozayari, eta presondegian hil zen, 1610. urtean. Haren omenez eta XVI. mendean sorginkeria leporatuta hil zituzten emakume guztien omenez sortu du Landarbasok azken ikuskizuna.
Tolaretxipik nabarmendu duenez, ikuskizunean elektronika erabiliko du Landarbasok lehen aldiz, eta horiez gain 8X3metroko pantaila bideo proiekzioetarako.
Lili Gurutzetak interpretatuko du Mariren papera, eta horiez gain, sorpresa ugari agindu dituzte, Pirata Mozkorra tarteko. Istorioaren narratiba laguntzeko off ahotsak ere izango dira, Josu Mitxelenak eta Koro Labandibarrek jarriak.
Mari Itsasargiaren estreinaldi handia igandean da, Fatimaren parrokian, 19:30ean eta sarrerak 8 euroan internetez eros daitezke, edota parrokian bertan ikuskizun hasi baino ordubete lehenagotik 10 euroan. Haurrek, 12 urtera arte, 3 euroan sar daitezke.
