Datorren astean zabalduko dute udaleku irekietan begirale aritzeko izen-emate epea
Maiatzaren 8ra arte eman daiteke izena
Urtxintxak antolatzen ditu Pasaiako udaleku irekiak urtero Pasaiako Udalak udaleku irekiak antolatu ditu uztailerako eta orain begirale bila hasiko direla iragarri du. Aurreratu dutenez, hilaren 29an irekiko dute izen-emate epea eta maiatzaren 8ra bitartean egongo da zabalik.
Parte hartzeko baldintzak, ondorengoak dira: 18 urte izatea eta euskara jakitea. Hautagaiek proba bat egin beharko dute eta hautaketa-sistemaren irizpideen araberako merituak baloratuko zaizkie baita ere.
Interesdunek Internetez eman behar dute izena, Urtxintxaren webgunearen bitartez. Ondoren hautagaiek proba bat egin beharko dute, maiatzaren 10en, ostirala, 16:00etan, Pasaiako Udal Euskaltegian (Euskadi etorbidea, 61, Trintxerpe). Zehaztu dutenez, proba 45 minutu inguruko talde-dinamika izango da.
Ondoren hautatuek oinarrizko prestakuntza ikastaro batean hartu beharko dute parte, udalekuetarako beharrezkoak izango dituzten programazio ereduez, metodo pedagogikoez, eta abarrez, gutxieneko heziketa izan dezaten.
Ikastaroa ekainaren 7an eta 8an izango da Arrokaundieta gazte aterpetxean. Udalekuetan lan egiteko derrigorrezkoa da ikastaroan parte hartzea.
