Emakumeentzat autodefentsa ikastaroa maiatzaren 18an Lezon
Autodefentsa ikastaroa zortzi ordukoa izango da, eta lau orduko saio bana egingo dute goizean nahiz arratsaldean Bekoerrota kiroldegian.
Zortzi ordukoa izango da ikastaroa. 18 urtetik gorako emakumeentzat autodefentsa ikastaroa egingo dute Lezon maiatzaren 18an. Trinkoa da, zortzi ordukoa: goizez 10:00etatik 14:00etara, eta arratsaldez 16:00etatik 20:00etara. Bekoerrota kiroldegian egingo dituzte bi saioak.
Lezoko Udaleko Berdintasun Sailak antolatu du ikastaroa. Izena emateko aukera hilaren 29tik maiatzaren 10era arte egongo da zabalik Gizarte Zerbitzuen bulegoan. Doan da, Lezoko Udalak 1.773 euroko diru laguntza jaso duelako Espainiako Gobernutik indarkeria matxistaren kontrako iniziatibak egiteko, tartean, autodefentsa ikastaroa.
Udaleko Berdintasun Sailak herriko emakumeak animatu ditu ikastaroan parte har dezaten, “ahalduntze bideari eusteko eta horiek indarkeria matxistari aurre egiteko baliabideak eskuratzeko”.
