Bi miloi euro inbertsio berriak egiteko
2018ko kontuen likidazioa egin du Errenteriako Udalak. Emaitza: 4.400.000 euroko soberakina. Horietatik 2.400.000 euro inbertsio berriak egitera bideratuko du orain.
Ion Cololar alkateordeak eta Jon Txasko Ogasun zinegotziak egin zuten soberakinaren gaineko agerraldia hilaren 12an. 2018ko kontuen likidazioa egin du Errenteriako Udalak. Emaitza: 4.400.000 euroko soberakina. Horietatik 2.400.000 euro inbertsio berriak egitera bideratu nahi du, eta horri begira, hilaren 30eko plenora aurrekontuetan aurreikusi gabeko jarduketak burutzeko proposamena aurkeztuko du gobernu taldeak.
Aurrezkiaren arrazoia, burututako finantza kudeaketa egokiaren emaitza dela esan du udalak: “Aurrezki horrek aukera emango dio udalari soberakinaren zati handi bat 2025 plan estrategikoko proiektuak egiten jarraitzeko erabiltzeko”. Soberakineko 400.000 euro Pontikako Barandiaran parean lurpeko aparkalekua egiteko obrak hasteko jasotako 500.000 euroko partidari gehituko dizkiote. Lan horiek hiru urte iraungo dutela eta lau miloi eurotik gorako kostu osa izango dutela aurreikusi du udalak.
100.000 euro bideratuko dituzte, halaber, abian jarriko den adinekoentzako tutoretzapeko etxebizitzak eraikitzeko proiektura. Egun liburutegia dagoen eraikinean egingo dute proiektu hori, liburutegia Lekuonara eramaten dutenean. Fini Rubio zenak Errenteriako Udalari miloi bat euro inguruko dohaintza egin zion 2016. urtean hirugarren adinekoen proiektuetan erabiltzeko, eta dohaintza horrekin jarriko da bian adinekoentzako tutoretzapeko etxebizitzen proiektua.
Beraungo Mikel Odriozola estadioa birgaitzera, berriz, soberakineko 340.000 euro bideratuko ditu udalak; aurretik 550.000 euroko ditu zatia bideratu zuen aurrekontuen barruan helburu berarekin. Obra hori, 2020an amaituko dela, eta aurrekontua guztira miloi eta erdi ingurukoa izango dela aurreikusi du udalak. Kirol arloarekin lotutako beste hobekuntzak egitera ere bideratuko du soberakina: Galtzarabordako kiroldegiko pista birgaitu, zorua leundu eta margotu, eta egungo igogailua ordezkatzeko igogailu berrian inbertituko du; Fanderiako futbol zelaiko ur beroaren sistema berrikusi eta hobetuko da, 100.000 euro inguruko inbertsioarekin.
225.000 euro gehituko ditu udalak soberakinetik, halaber, Beraungo igogailuko obrak hobetzeko. Aurrekontuan 780.000 euro bideratu zituen udalak horretara. Azkenik, ezustekoetarako gordetzeaz gain, Zerbitzuak hobetzearen aldeko apustuarekin jarraituko duela esan du gainera udalak, eta horren harira, herritarren eskaerei erantzunez, batez ere irisgarritasunarekin eta bizi kalitatearekin lotutako gaiekin egingo ditu inbertsioak, eta horrekin batera, komun publikoen sarea handitzen jarraituko du 70:000 euro inbertituta. Beste 230.000 euro mantenuko eta hobekuntzako obrak egiteko partidan gehituko ditu, baita energia berriztagarrien inguruko proiektuak egiteko ere.
