Joseba Zaldua Futbol Kanpusa egingo dute Lezon
Joseba Zaldua Futbol Kanpusa uztailaren 1etik 5era egingo dute Plazeta futbol zelaian. 2005-2010 urteen artean (biak barne) jaiotako haurrentzat da.
Joseba Zaldua. Argazkia: Inaxio Esnaola / Irutxuloko Hitza Realeko jokalari Joseba Zalduarekin lotutako astebeteko futbol trebatze jardunaldiak egingo dituzte uztailaren 1etik 5era Lezoko Plazeta futbol zelaian, Joseba Zaldua Futbol Kanpusa. Sportmadness enpresak antolatu du, Allerru Kirol Elkartearen laguntzarekin. 2005-2010 urteen artean jaiotako haurrentzat da, bi urte horiek barne.
Egun horietako saioak 09:00tatik 14:00tara izango dira. Bertan jokoak, teknifikazio ariketak, eta hainbat dinamika ezberdin egiteko aukera izango da, beti ere futbolean trebatzeko. Izen emateak 95 euroko prezioa du (asegurua barne); ordutegi goiztiarraren aukera ere badago, hau da, 08:00etan has daitezke kanpusean trebatzen haurrak, baina 10 euroko gainkostuarekin. Plazek muga dute. Allerruko jokalariek hobariak dituzte.
Futbol ariketak eskarmentudun entrenatzaileek gidatuko dituztela iragarri dute antolatzaileek. Gainera, parte hartzaileek ekipazio ofiziala jasoko dute, eta saioetan bisita bereziak izango direla ziurtatu dute. Horien artean, litekeena da Joseba Zaldua Realeko jokalaria Plazetara etortzea. Zozketak eta opariak ere egongo dira.
Izena emateko aukera jada zabalik dago, esteka honetan klikatuz joan daiteke eremu horretara.
Informazio gehiago nahi izanez gero, honako bideak erabil daitezke:
- Posta elektronikoz. kanpusaren mailera mezua bidaliz.
- Telefonoz. Honako telefono zenbakiren batera deituz: 627 88 24 85 edo 627 34 17 07.
